E di 6 rapport riba tratado di Hende Muhe na Nacionnan Uni

ORANJESTAD - E siman aki a tuma luga e di 65 sesion di e “Convention of Elimination of discrimination in all forms against women” (CEDAW) di Nacionnan Uni, na Geneve, Suisa. E tratado cu ta regarda proteccion di derechonan di hende muher cu a drenta na vigor na aña 1981 y a wordo ratifica door di 189 pais rond mundo. Cada pais tin e obligacion pa raporta periodicamente e progreso cu e pais a logra pa implementacion di e varios articulonan. 

A toca turno pa Reino Hulandes presenta nan reportahe, consistiendo di 4 rapport independiente cu ta representa cada pais den Reino. Na Aruba tin 58,000 hende muhe cu ta representa 53% di e poblacion. 

Minister Michelle Hooyboer- Winklaar pa di dos biaha a presenta CEDAW Rapport na Nacionnan Uni, hunto cu Minister Jet Bussemaker y representantenan di Corsou y di St. Maarten. 

E rapport ta cubri varios informacion tocante e situacion di hende muher relaciona cu participacion laboral, salubridad, participacion politico, educacion, discriminacion, violencia domestico y otro temanan. 

Hooyboer a presenta varios indicadornan y un compromiso pa pais Aruba sigui traha riba e progreso di hende muhe te na momento cu e convenio wordo implementa completo. 

E comision di Nacionnan Uni lo entrega e recomendacionnan final a base di e informacion presenta durante e reunion y e observacionnan.