Pontilius: Tin speransa pa un solucion ainda toch pa ex Aura Casino

ORANJESTAD - No obstante e hecho cu e operador di casino Island Gaming a 'pull out' di e plan pa tuma ex Aura Casino over, mediado di gobierno Anselmo Pontilius ta sigui kere cu tin chens pa 'rescata' esaki. De hecho, e siman aki Pontilius a combersa cu varios di e protagonistanan envolvi y no ta descarta cu e por logra algo. E intencion ta pa presenta un plan alternativo pa e partidonan por acepta pa asina tin re-apertura entre e gruponan envolvi. 

INTERPRETACION DI LEY

Segun Pontilius, ta dificil pa huzga e aplicacion di e ley cu ta den wega aki cu ta suppose di proteha e trahadonan. E critica di e abogadonan di e operador, ta cu e ley ta traha pa den un situacion normal, (ora cu asina cu un compania bula afo, e otro compania tuma over) tin proteccion pa e trahadonan envolvi. Pero den e situacion aki, el a bira un caso imposibel pa aplica e ley aki. Comercialmente e ta practicamente suicidio pa forsa un compania drenta cu un debe di 10 luna di salario. Y esey tabata un di e puntonan cu a pone e operador bula afo. Segun Pontilius, e ley ta relativamente nobo (2013/14) y ta solamente un sentencia di hues por trece claridad riba su interpretacion y su uzo. Si hues dicidi cu e ley ta corecto pa e caso aki, anto e ora e ta trece claridad. Pero aworaki e ley ta wordo interpreta di varios forma y como tal, pa Pontilius e ta dificil pa huzga su validez y aplicacion. Bisando esey, tambe Pontilius ta mustra cu enberdad semper por revoca e caso cu FTA a lanta contra e operador. "Si, esey por semper", e mediado a laga sa. Pero tin cu wak e situacion y analisa si e e resultado di e caso por resolve e situacion of no. Si FTA a actua robes of tabata dehado, ta dificil pa Pontilius bisa. Esaki pasobra bo tin un situacion unda cu tin dos grupo ta ranca na'bo, y depende di e interes y situacion, e ta bira un posicion dificil pa e sindicato. Tin un dilema ki desicion pa tuma y ta depende cu ken bo papia, cu ta mira e situacion diferente.