Peterson: ABC ta keda contra e proyecto hotelero na Isla di Oro

ORANJESTAD - Greg Peterson di Aruba Birdlife Conservation (ABC) definitivamente no ta sostene e proyecto hotelero na Isla di Ora (mas). Asina Peterson a sigura NoticiaCla.com e siman aki. Mientras cu nunca nan tabata parti di e proyecto, Peterson a bisa inicialmente cu contal cu e desaroyadonan lo a tene nan mes na un lista di por lo menos 20 punto, nan (ABC) lo 'por' a 'sostene' e idea. Pero mirando e desaroyonan cu a sigui, ABC enberdad a 'hala atras' y awor no ta sostene e proyecto mas. Ni si bin cu cambio mas positivo, e contesta ta 'no' pa sosten di e proyecto. Sigur awor cu tin 11 mil firma cu ta sostene e idea pa no desaroya nada asina den 16 area specifico, incluyendo Isla di Oro. Mientrastanto awe tardi e desaroyadonan di Isla di Oro ta presenta resultado di investigacion haci riba e parti ambiental. Ni asina, Peterson lo no cambia di pensamento. 

RELACION CU SYDOW

Peterson a confirma na e portal aki cu enberdad topa y reuni cu representante di e desaroyadornan, esta Franz Sydow. Aki Peterson a reitera e preocupacion pa cu medio ambiente y cu si e grupo cumpli cu e 20 puntonan, ABC lo por ta dispuesto pa sostene esaki. Sinembargo, cosnan a cambia na caminda y na april di e aña aki (2016), basa riba informacionnan ricibi, ABC a dicidi cu ta retira cualkier sosten cu por a duna na e proyecto aki. 

HUNGA 'MOOI WEER'

Segun Peterson, Sydow y su grupo no ta serio y no ta di confia. "E hendenan aki ta play mooi weer'" Peterson ta bisa, indicando cu ningun momento e desaroyadonan a 'haci un fout' cu e plannan ora cu nan a cambia esaki, manera cu nan ta implica. "Nan ta manipula" Peterson a bisa, splicando cu pesey nan a perde tur confiansa cu nan por tabatin den e grupo aki. ABC no kier ningun proyecto eynan, ni ningun otro caminda unda cu tin naturalesa y mangrove, manera cu e plan di proteccion di naturalesa (sostene pa Parlamento) a determina. Sigur no awor cu tin un lista di 11 mil firma cu ta sostene e causa di ABC. Segun Peterson, ni si cambia e proyecto den uno completamente safe pa medio ambiente, nan no lo sostene, pasobra esey ta practicamente imposibel.

RESULTADO DI INVESTIGACION HACI

Peterson no ta duna ningun balor na e supuesto resultadonan cu e inversionistanan di e proyecto di Isla di Oro lo kier presenta awe tardi. Esaki pasobra segun Peterson, ningun proyecto hotelero cu wordo traha den un area asina, no por wordo traha sin cu tin daño na e area. Pues pa bisa cu lo no tin ningun impacto negativo riba medio ambiente, ta absurdo segun Peterson. Ademas e lo kier wak un rapport independiente cu ta sostene e proyecto aki. Y esey no a tuma lugar awor aki. "Si tin un rapport cu ta demonstra cu no tin daño na e area, anto e ora ami ta riba un tipo di droga", Peterson a declara den un forma sarcastico.