Oduber: Fin di luna desicion ta cay si ta lanta partido of no

ORANJESTAD - Ex minister Otmar Oduber a anuncia awe mainta cu e ta dicidi pa fin di luna definitivamente si e ta lanta su propio partido of no. Esaki no obstante tur hende ta pensa cu e desicion ta tuma masha tempo caba, y cu ta solamente wardando e momento apropia pa anuncia esaki. Desde cu ela retira un siman pasa como minister, ela wordo confronta cu e desicion ey for di tur hende. Pero ainda e desicion final no a cay. "Mi ta haya comentario tur dia di hende cu ta puntra'mi." Oduber a bisa. E ta sinti cu tin un acogida enorme den comunidad pa e bay e direccion ey. Sinembargo, el a mustra cu e kier bin cu e cambio, en bes di e loke ta conoci caba di e forma di haci politica. Si e logra haya hende cu tambe ta pensa mescos riba un cambio asina, e por bin cu algo. 

BLUE IS THE NEW GREEN

For di masha tempo caba tabatin e informacion cu tur cos tabata cla caba pa e 'partido nobo di Otmar'. E ta mas bien un secreto publico eyfo, y cu Oduber tin tur cos cla caba, y cu ta djies e start mester wordo duna pa por ranca sali. A bay asina leu di bisa cu tin color y nomber caba, material cla, pero cu 'ta wardando e momento oportuno'. Hopi ta pensa cu e desicion ta cla masha tempo, pero ta simplemente wardando e momento strategico pa lansa esaki. Ora cu a confronta e mandatario y su hendenan, a refuta esaki bisando cu e asunto di blue is the new green, (saliendo di un partido berde y bayendo pa e color blauw), tabata meramente un campaña pa un producto di limpiesa cu tabata andando. NOTA: Foto ta di archivo di noticiacla ora cu Oduber a anuncia su retiro.