Reaccion politico di Aruba riba presidente Donald Trump

ORANJESTAD - Algun ora despues cu Donald Trump a keda eligi como e di 45 presidente di Merca, politiconan di Aruba a reacciona pa NoticiaCla.com riba esaki y kico e ta nifica pa nan como fraccion/politico y Aruba. E portal aki a logra combersa cu tur 4 fraccion, y presidente di Parlamento  di Aruba. 

PRESIDENTE DI PARLAMENTO

E prome pa reacciona tabata presidente di Parlamento, Mervin Wyatt-Ras. E ta felicita e presidente nobo di Merca sr. Donald Trump. Wyatt-Ras a tuma nota cu e no tabata un eleccion facil pa e comunidad di Estados Unidos y cu nan no a spera tal resultado. Sin embargo segun Wyatt-Ras esey ta parti di un eleccion unda cu tur cos por ta posibel. E tabata un eleccion unda e cantidad di votonan pa ambos candidato tabata hopi cerca di otro y unda cu te hasta prensa no a mira cierto posibel votadornan. Wyatt-Ras, cu ta casa cu un Americano, tin un relacion hopi estrecho cu Merca y Mericanonan. E no ta spera di mira cambio den e relacion entre Aruba y Merca. Den e caso aki e relacion aki ta di hopi añanan pasa y e relacion di Aruba cu Merca tambe ta estrecho pa loke ta trata turismo. Wyatt-Ras no ta mira cambionan den esaki tampoco. Wyatt-Ras tin hopi admiracion pa e trabou cu presidente Obama a haci especialmente mundialmente pa fortalece contacto cu otro paisnan y ta spera cu Trump lo por continua e trabou aki. 

AVP

Pa loke ta e fraccion di AVP, nan ta mustra cu democracia ta e miho forma di gobernacion. E ta imperfecto y dificil pa sigui tin biaha. Pero no tin miho sistema. Eleccion na Merca e demostra esey atrobe, segun e fraccion berde. "Mescos cu pueblo Americano nos ta respeta e desicion di Pueblo y felicita Merca cu nan presidente nobo" Rene Herde na nomber di e fraccion, a bisa NoticiaCla.com.

"Pa Aruba cu semper tabata tin y tin un hopi bon relacion cu Merca e resultado ta hopi importante. Merca ta e partner economico principal di Aruba. Merca ta e pais mas importante pa Aruba den hopi otro sentido. Independiente di ken a gana e eleccion, nos relacion cu Merca semper lo ta uno fuerte! Sinembargo mescos cu resto di mundo nos ta curioso pa wak kico e presidencia di Donald Trump lo nifica pa nos isla."

DEMOCRACIA REAL

E fraccion di Andin Bikker, ta mustra cu "e resultado di e eleccion presidencial na Merca ta indica cu gran cantidad di votador a scoge pa un cambio, en bes di 4 aña di un maneho igual", Asina lider di partido Democracia Real a bisa NoticiaCla.com como riba e resultado cu a comberti Donald Trump den e di 45 presidente di Merca.  Bikker ta mustra cu e partido republicano ta partido ruman di PDR, y pa medio di e miebrecia di International Democrat Union (www.idu.org) nan ta mantene relacionan cordial cu otro. 

MEP

Segun lider di partido MEP Evelyn Wever Croes, e pueblo Americano a vota pa cambio despues di 8 aña di e mesun gobierno. "Pa colmo un parti importante di prensa no tabata cu ne. Pa hopi no tabata importa ken e candidato ta, sino mas bien e cambio cu nan tabata anhela. Mi tin e impresion fuerte cu aki na Aruba tambe e sensacion ta igual, awor despues di casi 8 aña e mesun gobierno. Y e pueblo Americano a demostra cu ora bo kier cambio di berdad, nada ta importa mas. Bo ta bai p'e." Wever a finalisa bisando.

MARISOL LOPEZ

Pa e otro fraccion di un persona, Marisol Lopez Tromp ta mustra cu Merca a perde un momentum pa tin pa prome bes un presidente hende muher cu ta capacita y prepara p'e funccion. "Mi no sa con of ki impacto esaki por tin pa Aruba ainda, paso mester wak ki maneho e ta bay implementa y ki desicionnan" Lopez a finalisa bisando.