A tene simulacro pa test reaccion y asistencia den accidente di avion

ORANJESTAD:   Aeropuerto di Aruba a facilita un asina yama Full Scale Emergency Exercise (FSEE) (simularco) na Aeropuerto Internacional Reina Beatrix diamars anochi. E simularco a wordo organisa dor di Oficina di Maneho di Crisis (Bureau Rampenbestrijding) en cooperacion estrecho cu Aruba Airport Authority, Cuerpo di Bombero, Cuerpo di Polis, Imsan Departamento di Salubridad Publico, Departamento di Asuntonan Social, Marina Hulandes y aerolinea Southwest. Aruba Airport ta rekeri pa tene un simularco di tal indole cada 2 aña pa asina cumpli cu standard di ICAO, y pa asina keda cumpli cu e terminonan di e Certificacion di Operacion di Aeropuerto.

TIPO DI SIMULACRO

E simularco tawata consisti di un situacion di emergencia completo (full emergency), un aterizahe unda e avion a accidenta y e prome reaccion dor di tur instancia concerni, incluyendo e implementacion di e Plan di e Aerolinea di Assistencia pa Famia den coordinacion cu Departamento di Asuntonan Social y Cruz Cora.

E simularco a wordo planea y ehecuta durante oranan di madruga pa asina evita cualkier inconveniencia pa cu operacion di airport y aerolineanan. CEO di Aruba Airport, Sr James Fazio a expresa su gratitud na tur esnan involvi den e preparacionnan y ehecuccion di e simularco di e aña aki y a felicita e Oficina di Maneho di Crisis cu un excelente trabou.

Durante e simannan benidero tur esnan involvi den e simularco di e aña aki lo evalua e procedura y protocolnan di e simularco, y unda ta necesario, incorpora e recomendacionnan den nan plannan respectivo di reaccion.