ATIA a nombra ta nombra su Chairman di hunta y directora

ORANJESTAD -  ATIA a anuncia chairman nobo y directora nobo di e organisacion. Despues di un cambio di trabou cu lamentablemente a resulta den e resignacion di e chairman di e hunta di ATIA, Michel Henriquez, e hunta a vota y a nombra Ronnie van Trigt como chairman di e hunta di ATIA pa e restante di e aña 2016-2017. 

Ronnie van Trigt no ta un persona desconoci den mundo di comercio y a yega di fungi caba como chairman di e hunta di ATIA durante 2010 te cu 2013. 

Otro nombracion importante pa ATIA ta esun di e directora nobo, Michelle de Groot. De Groot tin un Master degree den International Business di Universiteit van Tilburg y tin mas di 10 aña di experiencia den tanto sector priva como publico caminda el a haci varios trabou den e area di marketing. E directora ta encarga cu e guia di operacion diario di ATIA. 

“Actualmente, ATIA ta trahando riba un plan strategico pa termino largo, cu lo wordo finalisa prome cu fin di aña, y cu lo fungi como e guia principal pa e futuro rumbo di ATIA como organisacion mas grandi di dunadornan di trabou na Aruba,” segun e directora. E plan aki lo defini con pa brinda maximo beneficio na e miembronan di ATIA. Enfoke principal lo keda riba sigi boga pa e interes di nan miembronan, pero tambe un clima economico sano den cual comercio por prospera. 

E sesionan strategico lo wordo guia door di e organisacion globalmente reconoci, International Labour Organization (ILO). Den futuro ATIA kier sigui colabora estrechamente cu organisacionan international pa asina haci uzo di e servicionan, know-how y asistencia cu e organisacionan aki ta brinda. 

ATIA ta sumamente contento cu e nombracion di e dos personanan aki y ta sigur cu lo aporta na e crecimiento y fortalesa di ATIA como organisacion.