Gobierno ainda 'negociando' reemplaso di ex minister Oduber

ORANJESTAD - Gabinete Mike Eman II ta den proceso ainda pa haya un persona pa reemplasa ex minister Otmar Oduber. Cos ta bayendo mas dificil cu a kere inicialmente, y segun fuentenan yega na e proceso, a pone un deadline pa awe pa keda cla cu e proceso, aunke e proceso pa reemplasa e ex mandatario no ta mara na tempo. NoticiaCla.com a compronde cu Gabinete ta na mesa ainda cu e candidato Richard Arends pa convence pa tuma e posicion di minister. No ta conoci ainda cua e lo tuma, y akinan e discusion lo ta pega. 

PLAN B

Dado caso Arends no tuma e funcion, gabinete lo pasa pa 'distribui' e respectivo carteranan entre e varios ministernan di e gabinete. Esey no tabata a intencion inicial, manera cu prome minister Mike Eman a anuncia siman pasa diabierna. E intencion tabata pa no duna e actual ministernan mas encargo, sino di busca un persona 'di afo' pa asumi e funcion aki. 

NINGUN HENDE CU TA RIBA LISTA BERDE

Un di e criticanan den comunidad ta pakico gabinete no ta uza un di e personanan cu ta riba e lista di e partido berde, of ta saca un persona for di fraccion di AVP den Parlamento y dun'e e encargo aki. E critica ta cu e plan di gabinete Mike Eman II kier implementa, ta duna esnan riba e lista original, un 'brevet van onvermogen' y no ta duna nan e balor cu nan merece, y cu nan 'ta bon pa ta yena lista si' pero no ta bon pa un funcion manera di minister. Di otro banda, ta prerogativo di gabinete pa apunta un persona cu nan ta determina cu ta cualifica pa e respectivo funcion.