Gobernador interino Yvonne Lacle cla pa su reto nobo

ORANJESTAD - E siman aki Aruba a conoce su Gobernador interino nobo, den persona di Su Excelencia Gobernador Yvonne Lacle-Dirksz. Durante un ceremonia solemn den Parlamento, el a dirigi su mes na tanto miembronan di Parlamento como invitadonan presente. Y for di e discurso, por saca afor cu sra Lacle ta bon na altura kico ta su tarea, e retonan su dilanti y con e tin pensa di eherce e funcion noble aki. Y na fin, di loke NoticiaCla.com por a compronde, tur esnan presente ta contento cu e loke cu nan a tende y mira. Esey ta nifica cu nan ta contento cu e Gobernador interino nobo. 

TAREA DI GOBERNADOR INTERINO

Den e discurso di Gobernador interino, el a describi e tarea cu e tin poni su dilanti, a identifica su mes cu e base pa su prestacion di su funcion y con e tin pensa di logra eherce su funcion nobo. Segun sra Lacle, e base di su funcionamento tin di haber cu e forma di trata hende. Aki e ta papia di trato igual pa tur hende y e respet cu ta bin cune. Sigur si ta trata cu un isla chikito manera Aruba unda cu tin mas di 90 nacionalidad, y unda cu e unico forma pa logra esaki, ta basa riba netamente esey esta trato igual pa tur hende y cu e respet necesario. Tambe sra Lacle a mustra cu e tin tur intencion di tin un relacion estrecho cu conseho di minister di Aruba. 

TRAYECTO DI ENSEÑANSA

Repasando su trayectoria profesional anterior, el a recorda tur cu e ta bin di e mundo di enseñansa, y durante e periodo aki a uza un forma di traha cu su alumnonan cu awor e kier a aplica tambe den su funcion nobo. De hecho, el a uza su 'publico' pa envolve nan den esaki dialuna mainta. Su forma cu el a uza, ta pa (manera den pasado) laga tur hende wak nan pasado y e historia, y for di esaki mira con por uza esaki pa progresa den futuro. Algo pues cu semper tabata e base di su forma di traha cu su alumnonan antes. 

CON PA EHERCE SU FUNCION

Sra Lacle a demonstra cu e sa exactamente kico ta wordo spera di dje, a deliña e forma con e tin pensa di logra esaki, y cu e lo haci lo maximo pa logra e loke ta wordo spera di dje den e periodo pa cual e ta funciona como Gobernador interino. Lesa e discurso integral aki.