Reducion ora parkeer meter y kita klem pa auto

ORANJESTAD - Entrante dialuna 14 di november, Aruparking ta adapta su orarion di parkeer. Esey ta nifica cu no ta cobra mas pa parkeer despues di 3'or di atardi. Cu esey, lo cobra 'apenas' 6 ora pa dia, compara cu 12 ora, ora cu e compania a cuminsa opera un aña pasa. Y si ta pa gobierno, prome cu fin di aña lo elimina e asunto di klem auto ora un automobilista no cumpli. Tur ta medidanan cu gobierno a anuncia diamars atardi laat, cumpliendo cu e promesa di prome minister Mike Eman diabierna ultimo, ora cu a anuncia cu lo 'flexibilisa' e orario di parkeer di Aruparking. E hecho cu e flexibilidad lo crea un 'buraco financiero' pa Aruparking, lo bay pa cuenta di gobierno, Eman a confirma na NoticiaCla.com.

POLITICO OF NO

Tabata diabierna ora cu prome minister Eman a reacciona riba e retiro 'repentino' di awor ex colega Otmar Oduber, cu a mustra cu un di e cambionan cu por haci awor cu Oduber no t'ey mas, ta 'flexibilisa' e orario di parkeermeter. Algo cu no por a haci cu Oduber na mando. Oduber a reacciona na NoticiaCla.com indicando prome cu ta sorprendi cu e accion, y cu e ta iresponsabel pa actua asina, desviando sin mas di un business plan di un compania. Eman enberdad a participa diabierna cu e siman aki lo haci e anuncio. Pero despues a pensa pa haci esaki mas despues. Sinembargo for di momento cu a haci e anuncio, e reaccion tabata asina grandi cu a dicidi pa delanta e anuncio aki. Mientras cu por bisa cu e ta un desicion politico, Eman ta sigura cu a sostene e proyecto di parkeer, pero cu na caminda a bin critica y mester a haci adaptacion cu no semper a bay facil. Cu e por awor cu Oduber no t'ey, enberdad ta 'algo politico'. 

BURACO FINANCIERO

Cu e 'anuncio' di reduci e ora di pago pa parkeer cu 4 ora pa dia, e ta crea un buraco financiero pa e compania, cu mester wak con e ta cubri esaki di otro forma. Den pasado, ora cu Aruparking, via gobierno, tabata anuncia dianan liber di parkeer aña pasa durante temporada di fin di aña, e buraco a wordo cobra pa gobierno. Na final di dia, e no ta 'realmente pornada' pasobra pagado di belasting ta paga pa esaki. Inicialmente diamars anochi, gobierno a anuncia cu lo purba ta creativo pa busca otro forma pa genera e placa 'perdi', y ta pensando den forma di cobra pa 'valet parking' (paga un persona pa parkeer auto di un cliente) pa un cierto area durante cierto rato y evento. Pero riba insistencia di e portal aki, prome minister Eman a admiti cu, mirando e sentido di responsabilidad y cu e compania ta 100% di gobierno, ta gobierno mes lo mester cubri e buraco aki na final di dia. "Si e no bin in de lengte, e lo tin cu bin in de breedte', Eman a bisa e portal aki, uzando e dicho Hulandes cu ta nifica cu e placa lo bin di un caminda sigur.