Oduber: Sorprendi cu e anuncio di Eman riba parkeermeter

ORANJESTAD - Ex minister Otmar Oduber ta lamenta e desicion cu gabinete Mike Eman II a anuncia inoficial riba cambionan di parkeermeter. E ta reacciona riba e anuncio di diabierna di sorpresa di prome minister Mike Eman anunciando 'flexibilidad' den asunto di parkeermeter. E cambionan ta wordo anuncia diamars atardi durante un conferencia di prensa. 

DESACUERDO ENTRE EMAN Y ODUBER

Mientrastanto e ta confirma si cu enberdad tabatin desacuerdo entre e y e prome mandatario riba e tema aki. Gran parti di e desacuerdo aki tabata p.e. ora cu kier a ofrece parkeo pornada, y cu tabata recorda prome minister 'ken tin cu paga pa esaki despues toch'. "Nos no por maneha un compania manera Sinterklaas". 

SEMPER TABATIN FLEXIBILIDAD

Segun Oduber, e proyecto no ta uno di Otmar sino uno di gobierno cu a wordo aproba pa conseho di minister completo y tambe 13 miembro di Parlamento. Ta pasobra e ta cay bou di Arubus pa yuda subsidia e situacion financiero, cu Oduber ta e minister responsabel. Y pa loke ta flexibilidad, e ex mandatario ta mustra cu semper nan a aplica esaki den e un aña y mey di e compania su existencia. "A cambia tarifa varios biaha, y tur tarifa tabata aproba pa conseho di minister" Oduber a sigui bisa. 

ANUNCIO A SORPRENDE 

E forma con e prome mandatario a sali afo cu e anuncio diabierna, a sorprende Oduber. "Mi ta haya poco straño (cu) prome minister ta sali sin a papia (mi ta kere) cu e director y sin wak e business plan" Oduber a bisa. "Pa tur cambio a midi e consecuencianan" e ex mandatario a sigui bisa. Segun Oduber, Eman no ta wak pa e interes di e compania si e ta actua asina.  Oduber a bisa. E ta recorda cu ta trata di un compania y no un departamento di gobierno.