Lo atende cu e caso di WEB ‘den rood’ den dialogo social e luna aki

ORANJESTAD – Durante e proximo dialogo social e luna aki, lo determina hunto con pa saca WEB y Elmar for di e situacion financiero cu nan ta aden aworaki. Minister di energia Mike de Meza a confirma na NoticiaCla.com cu enberdad e compania di utilidad WEB ta den rood, pero mes momento ta sigura cu e situacion no ta alarmante manera cu ta pretende. Mes momento e mandatario a mustra cu no ta asina tampoco cu lo aumenta tarifa di awa y coriente sin mas pa remedia e situacion financiero di e companianan di utilidad.

E problema financiero di WEB tin dos motibo segun e mandatario encarga. “Handling fees di e refineria a subi enorme (di 2 dollar pa 6.50 dollar) pa por procesa e fuel oil importa cu nan ta pomp pa WEB”, de Meza ta cuminsa bisa. Web pa varios aña a absorba e costonan aki, cu consecuentemente a afecta su situacion financiero negativamente. Mes momento a opta pa tin un maneho unda cu no ta fluctua e prijs mas manera cu tabata sosode antes. Si antes e prijs di coriente tabata fluctua algun biaha pa aña, for di 2010, e prijs tabata fluctua dos biaha pa aña so mientras cu for di 2012 esaki a fluctua apenas 1 biaha. E intencion tabata pa stabilisa e prijs. Tur esaki sinembargo a come den e situacion financiero di e compania.

Otro motibo ta e campaña pa energia alternativa cu e compania a hiba pa concientisa e comunidad pa uza menos coriente. Menos coriente sinembargo ta nifica menos uso y consecuentemente ta nifica menos entrada pa Web y Elmar. Tur esten e cantidad di trahado, salario y gastonan di empleado no a cambia y / of baha. Tur esaki ta motibonan cu segun de Meza, a pone cu awe tin WEB ‘den rood’. Pero e situacion ta remediable y lo atende esaki cu e stakeholdernan den e proximo dialogo social durante e luna aki mes. Hunto nan lo atende e asunto, duna e companianan chens pa haci nan presentacion riba kico tur por haci pa saca nan for di e ‘rood’ cu e companianan ta aden.