Listramento preventivo a conduci na control di 150 auto

ORANJESTAD -Cuerpo Policial a haci uzo di e ley di ‘Preventief Fouilleren’ (Listramento Preventivo) den fin di siman hunto cu Ministerio Publico pa un biaha mas tene accionnan di control den cierto areanan. Na varios ocasion Polisnan mester a detene personanan en conexion cu diferente ley.

Riba dia 5 pa dia 6 di november, Polis a controla 49 auto y a skirbi 17 proces-verbaal. Tabatin tambe 2 detencion relaciona na stuurmento bou di influencia di alcohol. A detene tambe 2 persona pa bebemento den publico (openbare dronkenschap) y 3 detencion relaciona na estadia ilegal nan Aruba.

Motor unit tambe a forma parti di e accionnan di control tumando luga y nan a skirbi 21 proces-verbaal pa chauffeurnan cu no tabatin nan documentonan, manera seguro di auto, na ordo. A takel un total di 5 auto, cu consecuencia cu e chauffeur y pasaheronan a keda na pia. Polis a kita rijbewijs di 3 chauffeur, mientras cu na tur a detene 5 chauffeur pa stuurmento bou influencia di alcohol.

Na tur Polisnan riba motorcycle a controla mas of menos 150 vehiculo y por a ripara cu stuurmento bou di influencia di alcohol a baha. E reduccion den e cantidad di chauffeur coriendo bou di influencia ta un consecuencia y resultado positivo di e control nan continuo di parti di Cuerpo Policial. E control nan aki lo sigui den siman y durante fin di siman for di awo te cu fin di aña.

Cuerpo Policial ta corda tur automobilista pa percura pa nan documentonan di auto ta na ordo. “Si bo ta bebe no stuur y si bo ta stuur no bebe” y corda bisti semper e faha di siguridad y percura pa muchanan chikito ta sinta p’atras den auto den nan carseat.