No por garantisa cu no tin candela riba dump

ORANJESTAD – Ta dificil pa haci algo pa para e sendemento di candela riba dump. Minister di medio ambiente Mike de Meza ta splica NoticiaCla.com cu mientras cu a tene reunionnan y ta tratando e asunto cu e instancianan concerni, “no por garantisa cu no tin candela”. E motibo segun de Meza ta cu e situacion na dump ta di tal forma cu no tin suficiente personal pa por atende cu e.o. e seguridad y control na dump. Y pa remedia e situacion, mester bin cu un plan cu ta costa placa. Pero e mandatario tabata determina si pa haci todo por todo pa elimina e asunto aki. “Nos mester ta pragmatico. Cos no por sigui asina” de Meza a sigui bisa.

E situacion ta uno peligroso na dump, y esey e mandatario a constata despues di a reuni e siman aki cu e instancianan concerni manera City Inspector y Serlimar. A bin compronde cu ta apenas 5 pa 6 persona so ta traha na dump den shift, y esey no ta suficiente pa sigura e lugar completo. “Tin 20 hende ta cana rond cu machete rond di e lugar” de Meza a confirma na NoticiaCla.com y e hendenan ey ta posiblemente haci e maldad di sende candelanan intencional. Nan ta cana rond, busca material pa sende na candela, y arma cu machete, ta haci e trabou pa e trahadonan di dump dificil y peligroso. “Tin un situacion peligroso eynan y nos tin cu bay atende cune” de Meza a sigui bisa. Pero mirando e area grandi cu tin cu cubri, e ta bira un trabou dificil. E mandatario a continua cu su reunionnan diaranson merdia cu varios departamento y a bishita e sitio atrobe pa purba mira con ta bay remedia e situacion ey pasobra e mandatario ta convenci cu e situacion no por keda asina.

Tabata diasabra pasa cu e dump un biaha mas tabata na candela, y cu a pone hopi hende spanta pa e huma diki cu tabata visto practicamente pa mitar di e isla. Mirando e localidad central di e dump, no a tuma mucho tempo cu e huma a bira un discusion general riba rednan social, variando di spanto pa e huma te na indignacion pa cu e danjo na nos medio ambiente. Bomberonan mester a paga e candela cu a origina door di palet y tire na candela, sendi mas sigur pa piromanonan activo atrobe. foto cortesia laprensaultimonoticia.com