DESPA: A lansa lansa campaña pa vacuna contra 'influenza'

ORANJESTAD - Departamento di Salud Publico ta lansa campaña pa vacuna contra “Influenza:  Director di Directie Volksgezondheid (DVG), esta Drs. Jerry Staring hunto cu Minister dr. Alex Schwengle, Dr. Wilmer Salazar y nurse Ronald Geerman a lansa e campaña pa vacuna contra influenza, urgiendo comunidad pa tuma e vacuna y preveni miho e impacto di Influenza A riba nan salud.

Staring a splica cu hopi biaha un persona ta sinti malo y ta papia di griep, pero e por ta un verkoudheid tambe. Griep ta bin pa medio di un virus y por trece problema serio pa e salud personal, pero tambe tin consecuencia grandi den e area di salud publico. Ela bisa cu den e temporada cu a pasa, ora tabatin un “outbreak” di influenza na maart/april ultimo, e impacto riba comunidad tabata considerabel. Mester tene semper na cuenta cu pa aña tin varios persona ta fayece di e efectonan di influenza.

Referiendo na e periodo mas recien, Staring a comenta cu e impacto riba e sistema di salud publico a refleha bek tambe den e area di economia cu hopi AO-melding, hospital tabata yen y hasta mester a manda pashentnan pa e centronan medico den exterior pa salba nan bida. Asina mes tabatin ocho persona a fayece como consecuencia di e efectonan di influenza.

Personanan den e grupo di riesgo halto, entre otro babynan bou di dos aña y e adultonan riba di 60 aña ta ricibi e vacuna gratis. Simplemente nan mester presenta cu un receta di nan docter di cas of specialista. Ademas di e gruponan di edad vulnerabel tin otro grupo di riesgo halto, incluyendo persona cu diabetes, hende muhe na estado, persona cu presion halto, persona cu ta HIV-positief y esunnan cu tin enfermedad manera cancer y otro condicion cu ta influencia nan sistema inmunologico.

Subrayando e compromiso di Directie Volksgezondheid pa cu e campaña di vacunacion, Minister Schwengle a suministra e vacuna contra influenza na Staring den presencia di e miembronan di medionan di comunicacion.

Ronald Geerman di “Dienst Besmettelijk Ziekten” na DVG a splica cu den e añanan anterior nan tabata pidi 2000 pa 2500 vacuna via PAHO, pero considerando e impacto mas recien di influenza riba comunidad a dicidi e aña aki pa bestel 6000 vacuna. Geerman ta encarga cu e plan y strategia di e campaña y a traha un programa unda cu a cambia e rol pasivo di Volksgezondheid den un “outreach program”. Tur persona di e grupo di riesgo cu ta desea ainda por pasa busca nan vacuna na Directie Volksgezondheid (DVG) cu receta di nan docter di cas of specialista. Riba e receta tambe por haya un programa di e luganan y oranan unda cu DVG su team ta den e diferente barionan pa administra e vacuna for di 7 di november pa 28 di november 2016. Pa esnan cu tin custumber di bay DBZ pa nan vacuna por haci esaki tambe.

Si un persona cu por ehempel ta biba na San Nicolas, pero ta traha na Noord riba e dia cu DVG ta na Noord e por pasa libremente y tuma su vacuna, basta e tin su receta di dokter di cas cun’e y carchi AZV, Geerman a laga sa. Como nurse na “Dienst Besmettelijke Ziekten” a splica cu pa algun aña caba nan ta monitor e programa di vacunacion y no ta yegando e cantidad desea y e ta pidi atencion pa e programa di vacunacion di e aña aki.

El a uza informacion di Centraal Bureau voor de Statistiek (CBS) pa determina unda tin e concentracion mas grandi di persona riba 60 aña ta biba pa traha e programa y asina facilita nan cu un ubicacion ‘cerca di cas’ pa tuma nan vacuna. A pensa riba e comodidad di e pashent y a scoge e luganan conoci den comunidad, unda cu tambe tin suficiente parkeo. DVG a haya 100% cooperacion di esunnan encarga cu e facilidadnan aki.

Pa personanan cu no ta cay den e gruponan di riesgo, e vacuna ta costa apenas 15 florin y solamente disponibel na DBZ. Lo evalua den transcurso di e campaña si mester bestel mas vacuna via PAHO, Geerman a agrega.

E periodo di influenza den nos parti di mundo, esta e “noordelijk halfrond” ta cay den e lunanan di “winter”, esta december, januari y februari. Motibo pa cuminsa cu vacunacion for di awo caba ta cu un persona su curpa ta rekeri dianan y tin biaha simannan pa reacciona y crea e anticurpa contra virus di Influenza y ta miho tuma e vacuna tempran pa e curpa ta protegi prome cu e periodo di influenza cuminsa. 

Personanan cu ta duda si nan por tuma e vacuna pasobra kisas nan ta sintiendo malo, of nan tin cualkier condicion cu ta afecta nan estado di salud, por yama  DVG na telefon 5224200 pa haya un evaluacion den forma di un “assesment” y determina si ta safe pa e persona tuma e vacuna contra Influenza.