SMAC: Prome evento di carnaval 63 ta Legends Festival

ORANJESTAD - SMAC y KPA a finalisa e schedule di Carnaval 63 hunto. Esaki ta regarda dianan, orarionan, localidadnan y rutanan pa cu tur evento organisa pa SMAC. Despues di e reunion anterior cu SMAC y Korps Politie Aruba a sinta hunto, SMAC a ahusta cierto aspectonan riba e schedule cu sosten di Gruponan Uni di Carnaval, otro comisionnan organisatorio y tambe siguiendo e consehonan di KPA. Di e manera aki Presidente di SMAC, Sra. Shannon Henriquez y Secretaria Sra. Zuleika Wever a presenta e version final di e schedule di Carnaval cu a keda acorda unanimamente pa KPA.

ESFERA DI POSTIVISMO

Durante e ultimo encuentro aki, por a bolbe sinti un esfera di positivismo y meta comun. Bou liderazgo di Sr. Rudy Soemers y Sra. Irma Gordon, KPA a enfatisa riba e responsabilidad grandi cu KPA tin durante temporada di Carnaval y cu nan ta conta cu SMAC pa haci lo maximo pa informa tur esnan cu ta participa y cu ta envolvi organisatoriamente debidamente di e reglanan di orden publico pa cada actividad y parada.

SMAC a keda sumamente contento di por conta cu sosten di KPA riba cierto cambionan riba e schedule mirando cu SMAC semper ta boga pa mehoracion organisatario y un experiencia optimal pa tur participante grandi y chikito como tambe publico en general.

Cu e finalisacion aki di e schedule di Carnaval 63, pueblo por spera di mira esaki via medionan di comunicacion y social media pronto, pa asina ta bon informa y pa por planea e temporada di Carnaval debidamente y for di trempan.

PROME ACTIVIDAD

SMAC ta anuncia na pueblo di Aruba, cu nan prome evento lo ta e “LEGENDS FESTIVAL” ariba diabierna 11 di november na CARNIVAL VILLAGE, San Nicolas.

Riba 11/11 por spera un celebracion di magnitud grandi. Por spera e.o. presentacion di kostuum di diferente grupo di Carnaval, lo honra varios legendario di carnaval pa nan sosten y aporte continuo na Aruba su Carnaval y tambe lo presenta e Jingle pa Carnaval 63.  

No menos cu 5 banda musical a confirma nan presentacion riba e anochi aki, cu lo sa di pone tur presente den e ambiente sin igual di Carnaval. Bandanan cu a confirma ta STEAM, Buleria, Tsunami, N-Fuzion y Le Groove.

Entrada pa Legends Festival lo ta completamente gratis y lo cuminsa pa 7’or di anochi y lo sigui te cu 2’or di marduga.  Pueblo por considera esaki como un inivitacion personal pa asina hunto cu SMAC inicia e temporada di Carnaval 63.