Jordy Groters y Daniella van den Berg ta saca cara di Aruba na China

NANJING – E landador arubano Jordy Groters a sali nr 5 den su Heat diahuebs cu un tempo di 29.03 y asina ta cualifica pa e semifinals di e 50m Breaststroke (mira e heat aki) . Mientrastanto e otro arubiano Daniella van den Berg a kibra su record personal cu 13 seconde y ta finalisa como number dos den su heat den e 800m free na Nanjing, China .Determina pa landa un bon evento, e landador Arubano, Daniella van den Berg a cuminsa cu su competencia den 800m estilo liber. E atleta van den Berg a start den lane number 7 y a cuminsa mesora den bon forma na e competencia. Segun e evento a transcuri, Daniella tabata na posicion number 3 y a mantene esaki pa basta rato, na di 550m y faltando 2 baan mas pa bai, Daniella tabata na di prome lugar, cual e momento ey sigur tabata un sorpresa enorme, mirando e liherez cu e tabata landa. Na final, Daniella van den Berg a logra un di dos lugar marcando un tempo nobo di 8:59.38, esaki tabata 13 seconde menos cu su tempo anterior cu tabata 9:12.35. Mester bisa cu e comentaristanan na China cu tabata transmiti e evento di landamento a elogia e forma con Daniella a landa y kibra su record cu 13 seconde, cual den landamento ta masha hopi mes. E atleta Daniella van den Berg lo mira accion bek diabierna 22 di augustus ora e mester competi den e 400M free. Un pabien sigur na e atleta Daniella van den Berg kende ta kibra su record personal den e 800m free cu 13 seconde.