Atraco arma na Grand Ocean Supermarket na Bushiri

ORANJESTAD - Pa mas of menos 7:30 di anochi a tuma un atraco na Grand Ocean Supermarket na Bushiri. Na yegada di patruya esnan cu a ser atraca a conta cu 2 hende homber color scur cu un arma di candela a drenta e lugar y a bay cu e cashregister completo cu tawata tin mas of menos florin 1200,- . Un di atracador tawatin un flanel blauw bisti cu jeans largo y un flanel blanco riba su cabez y e otro tawatin flanel cora cu jeans largo y petchi bisti. Inmediatamente diferente team di polis riba caminda a mobilisa y na altura di New Canton na Bushiri ta bin topa cu un Nissan Sentra blanco den mondi sendi ainda porta habri . E team di RRT, Flex team, K9 y polis nan di Sta Cruz y Noord y di Playa a cuminsa cu un buskeda den e mondi y vecindario, pero no a logra topa cu e personanan aki. Por bisa cu e auto nissan a wordo gejoyride un rato prome y na unda e atracador nan a uza e auto y lag'e atras den mondi despues di e atraco. Atraco team a yega na e sitio, tambe slachtoffer hulp y polis forensico. E caso ta bou investigacion di atraco team: Ken cu por a wak algo por fabor yama tiplijn di polis 11141.