SMOA a entama caso sumario contra minister di enseñansa

ORANJESTAD - SMOA  Stichting Middelbaar Onderwijs Aruba ta hiba minister di enseñansa Michelle Winklaar corte. Asina e presidente di hunta di supervision di SMOA, Bart Kool a confirma na NoticiaCla.com diabierna atardi. Motibo ta cu minister a rechasa peticion di Colegio Arubano pa subsidio pa paga salario di e rector nobo di e scol. Segun Kool, problema pa e subsidio ta e edad mas halto cu normal segun minister. Y SMOA ta diferencia di opinion cu e mandatario y p'esey ta bay corte. "Nos kier un claridad riba e realidad aki" Kool a bisa. Segun Kool, tin un diferencia di interpretacion entre SMOA y e minister. 

CASO SUMARIO

Kool a confirma pues cu SMOA a entrega e caso caba pa tuma lugar,  pendiente un caso di profundidad, esta bodem procedure. Cu e caso sumario, SMOA kier logra un asina yama 'voorlopige voorziening', esta un sentencia temporal cu cual nan por cuminsa funcion, pendiente e caso di profundidad. Si dado caso hues dicta contra SMOA, por lo menos nan ta contento cu tin un claridad, y sa unda nan ta para. Esey ta e intencion di SMOA pa laga un experto legal analisa esaki y determina kico ta e realidad aki. 

RECTOR TUMA CABA

Manera ta conoci, for di prome cu scol a habri na augustus, SMOA a logra haya un rector nobo cu a reemplasa Hans Timmermans cu a keda retira comienso di aña aki. Pero pa motibonan di e.o. pago di salario, no a keda cla pa anuncia su nomber pasobra Kool no ta haya ta corecto y tin un acuerdo cu SMOA no ta haci esaki prome cu tur cos. "Por lo menos di nos e (nomber) lo no sali". Kool ta consciente cu e nomber a lek eyfo, pero e no ta bay confirma e nomber aki te ora cu tur cos ta cla. E loke ta conoci, ta cu e persona aki ta un Hulandes masculino cu edad avansa.