Acuerdo entre tres parlamento riba binimento di Corte Constitucional

ORANJESTAD – Tin un acuerdo entre tres diferente parlamento (Aruba, St Maarten y Corsou) pa instala un instituto un forma di corte, pa resolve impasse of conflicto entre paisnan den Reino. Esey a keda confirma diaranson atardi pa lider di e delegacion cu a representa Aruba na St Maarten, nos presidente di parlamento Marisol Lopez Tromp.

Un informacion interesante ta cu ta resulta awor cu tur tres paisnan (Corsou tambe) kier trece tur casonan dilanti Raad van State unda e paisnan tin duda den e decisionnan, pa duna conseho si e decision- nan ta cumpli cu e Statuut. Tin un resolucion cu tin cu wordo hinca den otro ainda na Aruba. Tin tambe uno cu ta un Corte constitucional cu den un forma independiente di cua pais, partido of gobierno, por duna un veredicto riba un caso unda tin diferencia di opinion entre paisnan di Reino. E dos resolucionnan menciona lo wordo trata den parlamento. E ora parlamento por vota riba e mocionnan aki pa despues por sigui su caminda di formalisacion.

Lider di fraccion di e partido berde, Rene Herde a nenga cue conflicto di Aruba ta e motibo pa inicia e reunion na St. Maarten. E punto di crea un instituto pa hopi aña ta riba agenda caba pa motibo y tur paisnan a indica caba cu ta necesario. “Manera nos ta bisa: no por ta cu bo mes ta tuma e decision.

Mientrastanto fraccion di partido MEP si no a forma parti di e reunion na St Maarten. "Nos a ricibi e dos resolucionnan y sinceramente mi no ta compronde dicon mester a haci gasto pa e tripartiet aki. E prome resolucion cu ta toca riba “geschillenregeling” no ta nada nobo. Tin rapport, mocionnan y amiendanan riba mesa ya desde 2009 caba cu ta urgi Reino bin cu areglo pa desacuerdolider di partido MEP, Evelyn Wever a bisa NoticiaCla.com

E di dos resolucion cu a wordo tuma pa tripartiet ta cu Gobierno di Reino ta wordo obliga pa pidi conseho di Raad van State prome cu tur decision. "Pero ta parce cu nan no a haci nan huiswerk pasobra tin hurisprudencia cu ta mustra cu e consehonan aki no ta decisivo, pues nan no ta mara niun pais na nada. Esey a pasa cu Aruba tempo nos a perde Corte Superior. Raad van State a duna Aruba rason, pero sinembargo Gobierno di Reino, a pone e conseho ey un banda y kita Corte Superior di Aruba. Pues tampoco ta yuda Mike Eman awor cu nada." Wever a finalisa bisando. Foto Cortesia Masnoticia.com