Eman: Bermudez lo completa su termino normal di minister

ORANJESTAD - Kitando tur duda di un bes, prome minister Mike Eman diabierna atardi a confirma cu colega minister Angel Bermudez ta finalisa su termino normal otro aña. Esaki ela contesta prensa diabierna, kitando e rumor persistente cu Bermudez lo retira fin di e aña aki, pues no continua cu su termino como minister. E informacion cu tabata circula, ta cu como cu e no a haya e funcion di Gobernador, y cu awor cu e termina e presupuesto 2017 y e jaarrekeningen di e aña anterior, su trabou ta completa. Esey a resulta awor di no ta berdad. 

MINISTER DI TURISMO

Cu baymento di un rumor, a cuminsa un otro cu ta cu Bermudez lo reemplaza ex colega Otmar Oduber como proximo minister di turismo. NoticiaCla.com no por a confirma esaki ainda sinembargo aunke cu e rumornan ta bastante persistente. E intencion lo tabata, pa Bermudez entrega e cartera di finanza na actual consehero principal di minister Mike de Meza, Richard Arends, cu lo mester drenta como minister nobo di e gabinete Mike Eman II. Sinembargo, esaki no ta cuadra si cu e declaracion di prome minister Eman cu tanto e minister nobo di turismo como minister plenipotenciario lo ta personanan 'bou di 40'. Otro informacion cu ta circula, ta cu Arends lo asumi e tarea di minister di Turismo y cu finalmente ta Juan David Yrausquin ta bira e minister plenipotenciario na Hulanda. Otro siman posiblemente lo por haya confirmacion riba ambos posicion.