Eman: Dialuna ta 'flexibilisa' asunto di parkeer den Oranjestad

ORANJESTAD - Cu Otmar Oduber fuera di e pantaya, esaki ta habri caminda pa gabinete Mike Eman II haci algun ahuste cu anteriormente nan no por a haci. Un di e prome cambionan cu ta tuma lugar ta riba tereno di transporte. E prome mandatario a admiti pa prome biaha diabierna, cu e asunto di parkeermeter tabata algo cu e cu Oduber no tabata pensa riba e mesun liña.   Eman a anuncia mesora cu entrante dialuna awor lo introduci cambionan den e asunto di parkeermeter, unda cu mester pensa den reduccion di ora di paga (p.e. ora di atardi) y fechanan special. Algo cu tempo cu Oduber tabata encarga, e no tabata dispuesto pa haci. Pero awor cu Oduber no t'ey mas, por haci e cambio ey. Con exactamente esaki lo sosode no ta conoci, pero pa dialuna mester tende kico exactamente e cambio lo mester ta. 

PROYECTO DI PARKEER

Tabata na 2015 ora cu a introduci e proyecto di parkeermeter, cu inicialmente e proyecto a confronta hopi contratiempo, rechaso y problema. Pero na caminda cos a cuminsa drecha y a cuminsa adapta e proyecto pa asina e por a trece un win win situacion pa tur hende. A adapta tarifa, proceso y mas pa acomoda esnan afecta. Sinembargo, a keda e diferencia di opinion entre prome minister Eman y Oduber, pero cu no por a haci nada 'pasobra esaki tabata un cartera di Oduber, y mester a respeta cada cartera'. Eman a confirma su frustracion ora cu e tabata tende constantemente di cliente y comerciante pa haci algo y no por a haci nada pasobra Oduber no tabata pensa mescos. "Dialuna mes nos ta bay flexibilisa e asunto di parkeer" Eman a bisa. No ta conoci si esaki ta bay nifica cu poco poco lo elimina e proyecto completo, of ta simplemente haci algun adaptacion pa asina e situacion bira aun mas atractivo pa tur envolvi. Personanan rond di e minister tabata papia cu 'asunto di klem auto' a pasa pa historia, mientras cu otronan a bisa cu esaki ta wordo haci awor pa haya voto, net den temporada di fiesta y cu asina ta logra gana hende cu e paso aki.