Retiro Otmar Oduber ta acumulacion di varios cos

ORANJESTAD - Uzando e palabra 'ruptura', y refiriendo na 'algo doloroso' ta formanan con prome minister Mike Eman a describi e retiro di ex colega minister Otmar Oduber diabierna atardi durante un conferencia di prensa. Tabata su prome reaccion despues di cu un dia prome, ex colega Oduber a anuncia su retiro di e gabinete.  "Nos ta dese'e hopi exito, un hoben cu hopi talento y nos ta spera cu e ta keda na disposicion di comunidad" Eman a sigui bisa mesora tambe di su ex colega. Mes momento Eman a mustra cu si no ta pa su liderazgo (cu a wordo cuestiona pa Oduber), e ruputura entre Oduber y e resto di gabinete, lo a sosode na januari caba ora cu Oduber a haci e prome intento pa retira. A confirma tambe e problemanan cu a surgi den gabinete y cu 'cosnan no tabata cana segun colegialidad'. 

INTENTO PA TRECE BEK DEN TEAM

Eman a splica cu riba su peticion, coleganan a haci multiple intento pa 'trece Otmar bek den e team'. Y hopi a te hasta bay 'the extra mile'. Pero a resulta finalmente cu no tabata factible. "Cada bez tabata bira mas dificil pa traha cu colega Otmar Oduber" Eman a sigui bisa. E 'forma y estilo di funciona di Oduber a haci cu e situacion tabata dificil. Eman a referi na e loke a pasa cu Oduber, como un acumulacion di varios cos. " E mester ta agradecido cu e cos a keda asina largo" Eman a bisa, refiriendo na e hecho cu e no a bay pa termina e cos ora cu el a cuminsa na januari. "Mi no ta e tipo di lider ey cu ta termina cos mesora" Eman a bisa. Y cu e retiro di Oduber, e gabinete tabata para dilanti un desicion, y unda cu a habri un posicion den gabinete y cu mesora a inicia e proceso pa busca otro persona.