Concepto di 'zwarte piet' no ta cambia na Aruba

ORANJESTAD - E concepto di 'zwarte piet' ta keda manteni manera e tradicion. Como tal no ta bay adapta esaki estilo cu Hulanda ta haciendo e aña aki. Asina Fundacion Sinterklaas a declara e siman aki na e vespertino Amigoe. Motivacion pa esaki segun e fundacion, ta cu no mester cambia tradicion. Lo modernisa e concepto si, pero no manera cu ta haciendo radicalmente na Hulanda. Entre e cambionan, e zwarte pietnan no tin roetji mas, y nan cara ta varia di color. Pero no tin nan lipnan pinta cora fel, ni bistimento di renchi grandi na orea. Fuera di esey, e concepto manera cu nos a conoce pa 60 aña, ta keda mescos. E yegada di zwarte piet e aña aki ta dia 20 di november na waf. 

CRITICA NA HULANDA

Ultimo añanan na Hulanda (y cierto forma Aruba tambe) a lanta un ambiente di protesta riba e concepto di zwarte piet, unda cu ta considera e concepto aki como discriminatorio. Instancianan, gruponan di concientisacion a lanta y ta cambiando e percepcion di discriminacion door di trece cambionan basta radical na e concepto. Un canal di television por ehempel, lo no uza e 'zwartepiet' den su concepto conoci, sino lo presenta e version 'nobo' esta schoorsteen piet. Un persona cu en berdad a pasa door di un chiminea y a keda susha na preto (of otro color). Foto di archivo di NoticiaCla.com di yegada Sinterklaas na Aruba na 2015.