Sevinger: Oduber kier a impone riba cartera di tur minister

ORANJESTAD - "Cada hende tin cu tuma su desicion. Si nan no ta sinti nan mes bon cu nan trabou, nan tin cu saca nan conclusion" ta reaccion di minister di infrastructura Benny Sevinger riba retiro di su (ex) colega Otmar Oduber. Esaki e mandatario a bisa durante un entrevista pa e noticiero Telenoticia na Telearuba diahuebs atardi. E mandatario a mustra riba e intentonan cu a haci for di januari pa drecha e relacion entre Oduber y resto di e coleganan. "Pero e situacion no a drecha" Sevinger a admiti. 

ODUBER NO TA FACIL PA TRAHA CUNE

E mandatario a te hasta mustra cu Oduber no tabata un hende facil pa traha cu ne. "E tabata un persona cu su caracter cu nos no por a traha cu ne" Sevinger a sigui bisa di Oduber, bisando alabes cu 'e kier impone ariba cartera di tur minister'. Y segun e mandatario di infrastructura, el a duna Oduber tur espacio pa mete den cartera te unda cu tabata por. "Aparentemente e kier a haci mas". Y p'esey Sevinger a relata riba e problema cu tabatin pa traha cu (ex) colega Oduber. E forma con Oduber tabata pusha su cosnan den conseho di minister sin tene cuenta cu otronan. "Opinion di otro no ta conta, di dje so ta conta" Sevinger a sigui bisa. 

ACUSACION RIBA ASUNTO DI HOLIDAY INN

E hecho cu Oduber ta considera e asunto di 600 kamber di Holiday Inn como e motibo di su retiro, Sevinger ta haya un hilaridad y a yam'e 'nonsense'. Sigur ora cu ta considera cu ta haci como si fuera Sevinger a haci algo cu Oduber no tabata sa di dje y cu ta cos di awo. Segun e mandatario di infrastructura, ta aña pasa ela duna DIP e documentonan di e doño Alfred Lowenstein cu kier a expande y renova e hotel. Fuera di esey e no sa di kico Oduber ta papia. De hecho, segun Sevinger, e no ta firma pa hotel bira all inclusive, ya cu e no tin e competencia pa esey. Fuente: Telenoticia Telearuba.