Otmar Oduber a retira como minister 'per direct'

ORANJESTAD - E retiro cu awor ex minister Otmar Oduber a entrega na Su Excelencia Gobernador Fredis Refunjol, ta 'per direct'. Asina Oduber a bisa durante su conferencia di prensa na cas di su mayornan diahuebs atardi. Cu esaki e ta confirma e primicia di NoticiaCla.com di diahuebs mainta di su anuncio di su retiro. Despues di a entrega e carta di retiro, a sigui un conferencia pa duna detayes di su retiro. Entre nan, cu e 'no ta reconoce e moral y principio cu e partido a basa su mes ariba'. Tambe e hecho cu coleganan tabata 'boycott' su persona constantemente ta bin dilanti como un di e motibonan. Pero manera cu NoticiaCla.com a raporta anteriormente, e motibo principal, tabata e permiso firma pa un colega di dje, pa expansion di un hotel na Aruba. "Ayera nochi mi a sinti duele. Awe  mi ta sinti un entusiasmo pa futuro" Oduber a describi su sentimento di e ultimo 24 ora. 

CON E SITUACION TABATA DEN GABINETE 

Oduber a pinta un cuadro di e situacion dentro di gabinete Mike Eman II, cu a mustra manera un 'wespennest', unda cu coleganan constantemente tabata pone trompeca, boycotia, y strobe di funciona. E no a haci mencion specifico di ministernan, pero a referi na tur. Pa loke ta prome minister Mike Eman, e no a papia malo di dje, pero a referi na su inabilidad di tuma desicion na momentonan crucial ora cu cierto cosnan tabata surgi. "Boluntad no ta suficiente" Oduber a bisa. "Mester por tuma desicion tambe ora cu mester" e ex mandatario a bisa, refiriendo na premier Eman. Oduber a sigui describi e gabinete como 'yen di isla' cu ta traha riba nan mes, unda cu e wega ta di 'ken ta core mas duro y logra mas', 'falta di cooperacion', y unda cu 'principio di gobierno no ta serio'. A mustra claramente cu e problema tabata cu e gabinete y no cu Parlamento. "Mi no tin problema cu e fraccion y semper ma conta cu nan sosten. E problema tabata cu gobierno", Oduber a sigura. 

PARTIDO NOBO Oduber no a confirma cu e ta lanta un partido nobo, pero si a duna suficiente indicacion cu e ta bay den e direccion ey. E ta bay evalua e situacion y despues tuma su desicion. Declaracionan manera 'Lider no ta wordo traha, sino ta nace, mescos cu un partido no ta wordo traha pero ta nace', ta algun hint cu e ta trahando riba e parti di su futuro politico. Ela confirma cu elo sigui campaña manera cu ela haci tur e tempo cu e tabata den politica. Keda pendiente pa mas info.