Desaroyadonan Isla di Oro: Necesario pa clarifica inquietudnan

ORANJESTAD - "Nos a cumpli cu tur cos. Pero berdad den caso di boramento (den e awa na Isla di Oro) si nos a faya". Asina representante di e consorcio di inversionista Grupo Isla responsabel pa e proyecto hotelero na Isla di Oro, Franz Sydow a confirma na NoticiaCla.com e siman aki. Despues di a tende di varios inquietud den comunidad riba e proyecto, e portal aki a tuma contacto cu e grupo pa purba haya clarificacion. Y for di splicacion, ta mustra cu ta simplemente pa un falta di comunicacion, a comete un fayo cu a haya un rabo largo. Algo cu nan ta mustra di a coregi mesora y ta admiti cu tabata robes. Riba su mes, e proyecto ta uno cu una bes completa, por bira uno unico di su estilo, pero si un reto pa traha. 

PROBLEMA CU BORAMENTO DEN AWA

E parti cu mas critica a haya recientemente, Sydow ta splica cu mientras cu nan a cumpli cu tur rekisito, tur permiso pa haci nan trabounan preliminar pa e proyecto grandi di Isla di Oro, nan a haci trabou di boramento den e awanan, sin cu nan tin permiso pa esey. "Mesora ora cu nos a wordo avisa (pa DOW), a para tur e trabounan ey y ta wardando permiso pa haya acceso pa bora den e awanan en cuestion" Sydow a bisa. Pero fuera di esey, tur otro asunto a bay conforme cu ley, regla y a haci mucho mas pa sigura cu tur cos ta cana bon. 

CRITICA DI AMBIENTALISTANAN

Tabata recien cu e fundacion Aruba Birdlife Conservation (ABC) a lansa critica den direccion di e operacion aki, uzando fotonan cu ta ilustra boramento den e awa na Isla di Oro, indicando cu esaki ta matando naturalesa. NoticiaCla.com den combersacion cu e representante di e desaroyadonan a busca pa sa kico a sosode den e caso aki. Pasobra fuera di e critica aki, tabatin un lista di critica den e direccion di Grupo Isla. Y for di e combersacion cu Sydow, a resulta cu tur cos ta mas bien un mal entendimento, y cu ta pintando un cuadro cu realmente no ta cuadra. 

LISTA DI PUNTONAN CUESTIONA

Entre e puntonan cu e grupo ta wordo 'critica' y cuestiona ariba, y tambe ta circulando informacion, entre otro di e hecho cu 'diripiente' e diseño pa e proyecto conoci como Zoetry@ Isla di Oro a cambia di loke tabata e plan original. Segun Sydow, ora cu a introduci e plan inicial, a mustra tur instancia incluyendo gobierno y ambientalistanan, kico e proyecto mester a bira. E plan inicial a haya aceptacion mesora, incluyendo di gobierno.  Pero enberdad, na caminda a cambia esaki mirando cu no kier a simplemente haci un copia di loke tabata existi caba otro caminda. Y ora cu a adapta e plan original, a ripara cu tabatin obhecion pa esaki, incluyendo di e propio minister en cuestion (Otmar Oduber) y ambientalistanan. Segun Sydow, e ora a opta mesora pa cambia e plan bek pa esun original. Pero esey ta algo di hopi tempo atras y no awor. "Pues e plan original ta loke ta wordo traha ariba" Sydow a sigura e portal aki. E informacion cu e doñonan inicial a cambia y cu awor diripiente Sydow ta actuando solamente como un front man, tampoco no ta cuadra. Por lo menos no manera cu e ta wordo pinta, segun Sydow. E ta sigura cu semper ela representa e grupo di 3 inversionista, cu opera bou di e nomber 'Grupo Isla'. E mes tin interes financiero tambe den e proyecto, pero semper a representa e grupo aki mas tanto. Pues enberdad e ta front e grupo, pero esey no ta nada nobo. Pa loke ta e permisonan di tereno, Sydow a mustra cu nan a haya e terenonan di erfpacht di Isla di Oro, y esey no ta problema. Ta papia di e tereno riba tera na entrada di e isla, y tambe e parti pafo, e isla mes. Loke enberdad nan no tin ainda, ta permiso pa traha den e awa cu ta rondona e area aki y cu ta algo cu nan lo por haya despues cu cambia e asina yama ROP( Ruimtelijk Ontwikkelings Plan). Mientras cu nan tabata sa esey, nan no tabata na altura cu mester di un permiso pa por p.e. bora den e awanan aki. De hecho, segun Sydow, actuando riba informacion robez, nan a dal bay y haci un di e testnan cu tabata di boramento pa wak con fuerte e piso ta pa por traha e hotel. Ora cu nan a wordo atendi riba e punto ey, a para tur cos y ta pues wardando e permiso necesario. Fuera di esey, tur otro cos a bay cu permiso y den un forma transparente segun Sydow, manera cu tur otro cos cu e ta haci. 

PROBLEMA CU AMBIENTALISTANAN

Ora cu e proyecto a cuminsa, Sydow a sigui splica e portal aki, a tuma contacto cu tur esnan envolvi, incluyendo gobierno y tambe a haci intento pa comunica cu ambientalistanan pa sigura cu tur cos ta bau corecto. Cu intermediacion di minister Oduber -cu a goza e proyecto aki y ta sostene esaki tambe desde comienso-, a logra haya contacto cu Greg Peterson di ABC. A resulta cu fuera di ABC, a logra reuni cu por lo menos 4 di 5 grupo ambiental cu a prepara un documento di 20 punto cu e desaroyadonan mester a tene cuenta cu ne. Si nan (desaroyadonan) por a cumpli cu esaki, lo no tabatin problema. Segun Sydow, Grupo Isla a determina cu nan ta ok cu esaki y cu nan lo a traha un plan di accion pa logra cumpli cu tur e puntonan. A reuni algun biaha (2) cu Peterson pero despues di un tempo, diripiente Peterson a informa e grupo cu nan 'no ta na fabor mas di e proyecto'. Algo cu Sydow no ta compronde ainda pakico.  

TOWN HALL MEETING

E grupo a dicidi cu nan ta bay busca sosten di mas hende posibel, incluyendo e bario directo. A tene un town hall meeting den e bario mes, unda cu a invita no menos cu 600 persona, di cual nan a ricibi 500 firma di sosten. Pues nan tin sosten di gran parti di e habitantenan di e area en cuestion banda di Isla di Oro. 

TESTNAN 

Mientras cu ta wardando e cambio di ROP (Ruimtelijk Ontwikkelings Plan) recientemente a cuminsa haci un serie di test pa entre otro check e aspecto di pahra, pisca, musca, mangrove, e calidad di tera, y tambe e stabilidad di e tera. Tur a wordo haci pa expertonan specifico riba nan tereno. E unico test cu a haya problema cu ne, manera indica caba, tabata esun di boramento pa midi e forsa di e vloer bou di awa. Tur otro prueba a wordo haci, pa cual lo tin un presentacion dia 10 di november awor pa prensa unda cu lo presenta e resultado di e investigacionan haci. Durante e presentacion aki, lo mustra tur loke a wordo haci, haya y kico e ta significa pa e proyecto. 

E PROYECTO

E proyecto mes segun Sydow, ta uno cu lo mester bira un proyecto hotelero cu por atrae eco turismo, ya cu e lo tin tur faceta cu ta interesa e tipo di turista aki. E mester ta un proyecto cu ta tene cuenta cu tur aspecto di naturalesa, y como tal a percura pa busca solamente e miho den tur e partinan aki, certifica, pa garantisa cu no tin ningun problema pa cu e area aki. Lamentablemente nan a faya cu e parti di e boramento, cu ta de hecho, e unico cos cu a bay robes segun Sydow. Nan a siña nan les y ta convenci cu e proyecto ta beneficia Aruba y su turismo. Nan tin speransa tambe cu na caminda nan lo por convence ambientalistanan cu ainda tin duda of cu ainda ta contra e proyecto.