Desicion a cay: Otmar ta retira como minister awe!

ORANJESTAD - Desicion a cay! Fuentenan cerca di e proceso a confirma na NoticiaCla.com cu awe minister Otmar Oduber ta entrega su retiro como minister. Manera cu e portal aki a informa ayera, tin un tension den e gabinete y un di e problemanan ta e situacion entre Oduber y su coleganan minister. Fuentenan a confirma cu Oduber mientrastanto ayera nochi laat a tuma su desicion despues di a reuni cu su hendenan. "Tabatin un reunion fuerte awe nochi y no tin solucion" ta loke otro fuente a confirma ayera nochi laat. Y awe mainta Oduber lo mas probabel entrega su retiro na gobernador. E fuentenan a informa pa keda pendiente pa un conferencia di prensa cu Oduber lo duna den curso di awe ainda riba e topico aki. 

SITUACION FASTIOSO

E situacion a empeora ultimo dianan unda cu Oduber tabata reuni y despues sali rabia pasobra coleganan lo tabata boycoti'e constantemente cu su proyectonan. Entre otro cu permisonan, firma di cosnan contrario di loke mester sosode y mas. Ayera cos a bay di tal forma cu un biaha mas Oduber no tabata nada contento y kier a 'pull the plug' ayera mes. For di atardi tabatin rumornan fuerte cu 'Otmar a retira'. Esaki sinembargo no tabata berdad, pero si cu cos 'por a rementa' un ora pa otro. Durante un reunion cu su 'achterban' ayera nochi, (fuentenan a informa) tabata bisto cu cos lo no a drecha mas y cu no tabatin otro caminda sino retira for di e partido y como minister. Y awe mainta e desicion final a cay. Kico esaki ta nifica pa e partido, no ta conoci, aunke inicialmente esaki ta basicamente nifica cu AVP ta perde un minister, pero cu por wordo reemplasa pa otro. Contrario na e situacion di parlamentario cu retira y por keda cu su asiento, den e caso aki esey no ta sosode. 

PARTIDO PROPIO

Loke ta mas cu sigur, ta cu Oduber awor lo lanta su partido propio pa bay e proximo eleccion. For di masha tempo tin informacion ta circula cu Oduber tabata prepara su propio partido, y cu esaki no tabata cuestion di si e ta haci'e, sino ki ora y dia. Keda pendiente pa mas informacion.