Marlon Sneek a bira lider di fraccion partido AVP

ORANJESTAD - Fraccion di AVP a cambia su lider di Rene Herde pa Marlon Sneek. E traspaso a tuma lugar diaranson mainta segun informacion di e partido. Sneek tabata lider di fraccion interino for di 2013 y Herde tabata lider di fraccion for di 2009. Chris Dammers ta asumi funcion di lider di fraccion interino.  E otro desicionnan tuma, tin di haber cu reparticion di tareanan interno den e fraccion, formanan nobo pa reunion den e fraccion y preparacion pa e aña di bedate publico prome cu eleccion 2017.  

PAKICO SNEEK?

Fraccion berde a splica cu motibo cu Sneek a bin na remarke, ta pasobra el a demostra 'un creatividad, inteligencia y habilidad politico grandi den e shete aña cu a pasa. Ela crece enormente y tanto na Aruba como den relacionnan den exterior, a demostra un capacidad y madurez pa maneha asuntonan y situacionnan den un forma cu a gana respet den y pafor di partido y Parlamento. E hoben politico aki sin duda ta promete hopi pa futuro. Su nombracion como lider di fraccion ta simpelmente un paso logico mas den su carera', e fraccion a sigui bisa. 

PRESENTACION

Diahuebs mainta e lider y lider interino di fraccion di AVP lo wordo presenta na prensa local y internacional. Rene Herde' lo keda ocupa e funcion di Vice Presidente di Parlamento y di presidente di e Comision di Ausntonan Exterior & di Reino di Parlamento di Aruba. Fraccion di AVP ta felicita e lider y lider interino nobo di fraccion di AVP y desea nan hopi exito den nan funcionnan importante den Parlamento.