Situacion tenso atrobe den gabinete Mike Eman II

ORANJESTAD - Situacion den gabinete Mike Eman II un biaha mas ta mustra tenso. Fuentenan cerca di e gabinete, a confirma pa e portal aki cu e ultimo dos dianan p.e. tabatin hopi disgusto y no ta descarta cu dentro di poco por tin 'sorpresa' prome cu fin di e luna nobo aki. Y mientras cu e ta zona algo sensasionalista, e fuentenan a mustra cu esaki ta e realidad cu tin den e gabinete. For di un minister cu ta bandonando reunionnan rabia, te na otro cu ta rabia pa medidanan tuma contra cierto negoshi, te na reentrada di un otro ex minister den gobierno. Tur ta hechosnan confirma, cu a y ta tumando lugar y ta 'broei' den gobierno. 

NoticiaCla.com a compronde cu e siman aki varios biaha un di e ministernan, (Otmar Oduber) tabata bandona reunion(nan) rabia y disgusta, te na un punto cu hendenan a pensa cu e biaha aki si, e retiro tan anticipa a tuma lugar. Mes momento tin un otro minister cu ta disgusta pa motibo cu a pone ordo riba un club nocturno su orario y cu esaki no a cay den bon tera cerca dje. Otro situacion cu no ta mucho positivo ta e posibel re-entrada di Juan David Yrausquin como minister plenipotenciario. Y finalmente, indicacion cu fin di e aña aki minister di finanza Angel Bermudez ta bandona e gabinete. E situacion actual pues, no ta uno trankil, y tin hopi den seno di gobierno preocupa.