ATIA: Comerciante mester combati ilegalidad na trabou

ORANJESTAD -ATIA a bin cu apelacion pa comerciantenan encuanto ilegalidad. Den un comunicado di e gremio comercial, ATIA a relata riba nan reciente reunion cu minister di husticia Arthur Dowers riba e tema di ilegalidad. Segun e gremio, nan ta kere firmemente den reuni regularmente cu mandatarionan y instancianan importante pa asina mantene un relacion estrecho cu ta facilita dialogo na momento cu mester intermedia na fabor di comerciantenan cu ta miembro di ATIA. 

PROBLEMA DI ILEGALIDAD  

Segun e gremio, un di e problemanan enfrentando nos comunidad na e momento aki ta e caso di ilegalidad. Nan ta referi riba e hecho cu den medionan di comunicacion por lesa riba varios caso caminda polis y Warda Nos Costa ta controla negoshinan y ta bin haña ilegalnan trahando na e establecimento. Loke e comerciantenan aki mester realisa ta cu dunando ilegalnan trabou, esaki no solamente ta stimula hendenan procedente di otro paisnan pa drenta nos pais, probablemente na un manera legal, y dicidi di establece nan mes ilegalmente na Aruba, pero tambe ta trece costonan innecesario pa gobierno. Na momento cu un persona cu ta habitando e isla ilegalmente bira malo of muri, e gastonan ta cay riba Aruba. Ora di deporta e personanan aki, tambe e gastonan ta cay riba Aruba. 

NO PARTICIPA DEN PRACTICA ILEGAL

ATIA como representante di e mayoria di comerciante aki na Aruba ta urgi e comerciantenan pa no participa den e practicanan aki, cu riba su mes tambe ta un crimen. Mester pone enfasis tambe riba e caso den cual si un negoshi ta hasi uzo di un contractista y e contractista aki ta hasi uzo di e labor di personanan cu ta ilegalmente na Aruba, no solamente e contratista ta responsabel, pero tambe e negoshi cu a contrata e contractista aki. Como comerciante mester asumi e responsabilidad y sa ken ta trahando pa e negoshi en realidad. Ministerio di Husticia ta trahando riba maneranan pa atende cu e problema aki di un manera mas efectivo. 

MAS FONDO PA 2017

ATIA ta spera cu pa 2017 gobierno lo pone mas fondonan disponibel pa seguridad pa asina tin mas inversion den e area aki. ATIA semper ta dispuesto pa scucha y comparti informacion y alabes bin cu sugerencianan alternativo pa combati y preveni criminalidad.