Cruz Cora Aruba a inicia celebracion di 59 aña cu sorpresa

ORANJESTAD−  Cruz Cora Aruba a celebra su 59 aña di existencia cu un atardi yena cu hopi sorpresa pa su voluntarionan. E atardi a cuminsa cu speech di Tesorero di Board, Sr. Hans Ruiter cu a duna bon bini na Sr. Helfrich di Aruba Bank, Lieutenant Colonel van Dishoeck, comandante di Marinierskazerne Savaneta, y tur otro invitado. Y asina oficialmente tambe a habri e aña rumbo pa celebracion di 60 aña di e organisacion humanitario aki.  

Boluntarionan Nyeella Wanapa y Ronald Roos a wordo yama padilanti pa ricibi nan oorkonde pa nan 30 aña di dedicacion na Cruz Cora Aruba. Despues Sr. Helfrich di Aruba Bank a wordo invita pa presenta Sra. Marieta Wanapa cu e uniform nobo di Cruz Cora cu a wordo gesponsor pa Aruba Bank. Na e momento aki, algun boluntario a sali di sorpresa y a modela pa tur nan coleganan por wak e bunita diseño nobo cu a caba di yega di Hulanda. Aki por a tuma nota cu e color blauw cla a wordo incorpora den e branding nobo, y pesey tambe esaki a wordo implementa ora di diseña un logo special pa e 60 aniversario.  E logo aki a wordo inspira pa e trabou cu Cruz Cora ta haci: Duna un man pa yuda un otro den un momento dificil.

E presentacion cu a sigui tabata inespera pa tur hende presente, ya cu a corona, Srta. Gabriela Willems, como “Anniversary Queen” di Cruz Cora. Como embahadora di Cruz Cora, Srta. Willems lo ta activo den comunidad pa mustra e trabou di e boluntario di Cruz Cora y pa motiva otronan pa haci trabou boluntario. E lo trece un mensahe positivo entre hobennan na Aruba.

Ora cu tur hende a kere cu esaki tabata e ultimo sorpresa di e atardi, tur cara a keda sorprendi pa wak un ambulance yega y parkeer dilanti Cruz Cora. Aki a compronde dicon tabata tin varios representante di Marinierskazerne presente na e actividad aki. Pero no por a sospecha cu tabata pa warda yegada di e ambulance cu kazerne a regala Cruz Cora.  Un 4-wheel drive ambulance cu capacidad pa transporta 4 patient. Esaki ta un adkisicion significante pa e capacidad existente di ambulance na Aruba. Lieutenant Colonel van Dishoeck a haci e entrega di yabi y a conta un tiki di e relacion entre Cruz Cora y Marine. Ela pidi tambe pa e relacion aki por sigui semper cu e mesun bon colaboracion. Esaki ta un tremendo gesto di Marinierskazerne, ya cu e otro ambulance di Cruz Cora tin 10 aña caba. 

Cruz Cora Aruba kier gradici Aruba Bank pa e bunita uniform. Marinierskazerne pa e ambulance y tambe Yrausquin y Car Colour Aruba pa e make-over.