Eman: Tilma y Yrausquin dos candidato pa minister plenipotenciario

ORANJESTAD - Ex minister di finanza Juan David Yrausquin y Cedrick Tilma ta dos candidato cu conseho di minister di Aruba ta evaluando pa e funcion di minister plenipotenciario di Aruba na Den Haag. Asina prome minister Mike Eman a confirma na partner di NoticiaCla.com, Caribish Netwerk. 

Segun Eman, e ta den combersacion cu resto di conseho di minister y e fraccion di su partido AVP, pa wak cua di e dos candidatonan ta gosa di mas sosten. Ex minister plenipotenciario Alfonso Boekhoudt a keda nombra como proximo Gobernador di Aruba y a wordo retira di su funcion como minister recientemente. 

E nomber cu mas ta resalta ta esun di Juan David Yrausquin. E no a solamente bandona su posicion como minister di finanza prome cu tempo na 2014 despues di e crisis presupuestal, cu a conduci na e welga di hamber di Eman, pero a bandona e filanan di AVP tambe. Despues el a bay New York pa studia. 

Tilma actualmente ta hurista na Brusela y ta representa Aruba na Union Europeo. 

Pa Ariën Rasmijn   Caribisch Netwerk