Ainda no tin minister plenipotenciario nobo pa Aruba na Hulanda

DEN HAAG - Entrante diamars 1 di november, e retiro di Alfonso Boekhoudt como minister plenipotenciario a drenta na vigor. Mes momento esey ta nifica cu for di awe, oficialmente Aruba no tin un minister plenipotenciario nobo apunta. For di algun siman caba (despues cu a retira Boekhoudt di su funcion) tin nombernan cu ta circula. Entre nan ex minister Juan David Yrausquin y actual representante di Aruba na Brussels esta Cedric Tilma. E dos nombernan aki ta keda circula, aunke cu tambe nomber di ex minister plenipotenciario na Washington, Joselyn Croes tambe a keda menciona. Un medio di prensa cu hopi fanfaria a anuncia siman pasa cu ta Juan David Yrausquin ta e persona mas probabel, pa despues di algun dia, anuncia cu ta Cedric Tilma ta e persona. Hecho ta, cu oficialmente gobierno no a nombra ningun persona den e funcion, of por lo menos no a participa esaki publicamente. NoticiaCla.com tin confirma cu contrario na otro funcionnan, no tin un minister plenipotenciario 'interino', pasobra nan nunca a 'actua' riba esaki pa nombra un persona den e funcion ey como suplente. De hecho, e ultimo nombracion unda cu Boekhoudt finalmente a keda apunta, mes tabatin problema pa haya un persona pa e funcion ey.