Vespertino Amigoe tambe victima di atake cybernetico

ORANJESTAD - E vespertino Amigoe (di Aruba) tambe a keda afecta pa un atake cybernetico. Den nan edicion dialuna riba nan portada, nan a admiti cu enberdad den fin di siman, nan tambe a bira victima di e problema aki. Tabata den weekend ora cu diripiente multipel persona a ricibi un email di varios adres di amigoe, cu e titulo 'payment outstanding', esta pago pendiente. E ta un virus cu, ora un persona click riba e email, ta habri un portal pero cu no tin efecto maligno, segun Amigoe. E departamento di IT ta averiguando nan sistemanan pa wak con nan sistema a keda afecta. Fuera di Amigoe, tabatin mas compania cu siman pasa a keda afecta. Un di nan cu a admiti esaki tabata e compania WEB cu pa varios dia no por a duna servicio di caha como consecuencia. Pero pa diabierna esaki a keda resolvi. Asina tin mas compania cu tambe a keda afecta. SETAR a desmenti na NoticiaCla.com nan fayo recien tambe tabatin di haber cu un atake cybernetico, y cu ta algo puramente tecnico.