TMRG y FTA a causa cu awe trahadonan ta sin trabou!

ORANJESTAD - Trahadonan perhudica cu operador Island Gaming a hala atras di e deal den weekend, ta malcontento, pero cu FTA. Cu condicion cu nan por keda anonimo, nan a informa NoticiaCla.com cu e problema ta sinta na e sindicato. "Hubert di FTA ta nenga di para e caso. A prefera tene cera y awor 26 tata y mama di famia lo keda sin trabou pa su capricho" e grupo di trahado a bisa. Segun e grupo, nan ta pensa asina pasobra mayoria a prefera di acepta loke tin riba mesa, a cambio di por a bin na un trabou. "E compania Island Gaming tawata tin bon boluntad pa a habri'e y duna asina toch cupo di trabou y di buena fe, soluciona un parti di e problema cu e ex operador nan di TMRG y FTA a causa na nos trahadornan". Segun e trahadonan, ta TMRG y FTA a causa tur e problema di duna e ex operadornan tur e chance di scapa y bula afor y laga tur 44 trahador sin trabou. "Y ainda na final nos trahador a bay FTA vota pa a bay corte, nan esta Hubert di FTA a wanta e caso por lo menos 9 dia mas sin avisa nos nada di esey. Y asina duna mas tempo na TMRG por a declara bancarota" e trahadonan a bisa. "Nos opinion tambe ta conta".

DEAL A CAY

Tabata diabierna anochi cu NoticiaCla.com a haya confirma cu e deal tabata off, y cu Island Gaming no ta sigui cu esaki. E sindicato su abogado mientrastanto dialuna a mustra cu no obstante e situacion 'nobo', e sindicato ainda lo hiba e operador nobo Island Gaming corte. Esaki pasobra nan tin cu wordo teni responsabel pa nan accionnan y mester cumpli cu e ley cu ta proteha trahado. E operador tabata sa ora cu nan a drenta den e caso aki, pues no por bisa awor cu nan no 'tabata na altura'.