SAC tin te diamars pa resolve impasse cu Gruponan Uni

ORANJESTAD – Stichting Arubaanse Carnaval (SAC) tin cu dicidi si nan ta bay di acuerdo cu e proposicion cu minister di Cultura a haci na nan. Si nan rechasa e oferta, nan lo por wordo reemplaza como vergunninghouder di nos carnaval y cu SAC no por organisa carnaval mas pa pais Aruba. E proposicion ta cu SAC tin cu cambia nan forma di operacion y constelacion y pa duna gruponan di carnaval mas participacion den carnaval. Minister di Cultura, Otmar Oduber a duna nan te diamars awo pa presenta nan contesta por escrito.

Oduber, cu ta e mandatario responsabel pa carnaval, a splica NoticiaCla.com cu e ta spera cu cos no yega dje leu ey, pero cu e situacion no ta mustra bon. “Nos tin un problema hopi serio” e mandatario a bisa despues di un reunion cu SAC cu e mes a cataloga como uno tenso diaranson atardi. “Mi no ta mira cu nos por sali for di e impasse aki” e la sigui bisa, aunke e ta keda positivo cu pa diamars SAC lo por bin cu un contesta positivo cu por trece pas entre SAC y e gruponan Uni.

E problema ta cu e ‘Grupo Uni’ (total di 95% di tur grupo di carnaval cu a participa den carnaval 60 cu excepcion di un grupo) ta mustra enfaticamente, -cu carta firma pa abogado-, cu nan no ta participa mas den carnaval di Aruba cu SAC den e constelacion manera cu e ta aworaki. Algo cu a wordo confirma pa propio secretario Rene Ridderstaat di SAC, segun Oduber. Na final di e reunion, minister a duna SAC dies minuut pa entre nan, dicidi si nan ta acepta su proposicion. Despues di e 10 minuut, SAC a laga sa cu nan kier reuni den nan seno prome, cual peticion tambe a wordo honra y cu minister a duna SAC te diamars awor.

Si SAC dicidi cu nan ta bay di acuerdo, nan por sinta hunto cu e gruponan uni, cu ayudo di un triumfiraad, cu den dos siman mas tarda 15 di september tin cu dicidi ki rumbo gobierno ta bay cu carnaval di Aruba. Si diamars SAC dicidi cu nan no ta bay di acuerdo, ta nifica cu gobierno ta cay aden mesora cu consecuencia cu SAC por perde su permiso y derecho di organisa carnaval y gobierno ta cuminsa tramite pa reemplaza SAC cu un otro instancia cu tin cu maneha e proximo carnaval. Asunto di musica no a keda discuti y esey ta keda como otro reunion cu e mandatario tin cu atende proximamente.

Di parti di SAC, e presidente Tecla Kelly a confirma cu aunke e reunion tabata den bon ambiente, e tabata tenso pasobra mester a pensa bon kico mester a wordo papia. Kelly a mustra cu SAC ta disponibel pa traha hunto. “SAC No tin problema, inclusive si kier sinta cu e gruponan” Kelly a sigui bisa. E la admiti cu gruponan kier forma parti di desicionan di SAC y SAC ta habri pa tur sugerencia aunke no ta kere cu e gruponan mester ta aden. “Pero si esey ta e caso, SAC lo no tin problema tampoco” Kelly a sigui bisa.