Oduber: No tin low season mas pa barconan crucero

ORANJESTAD - Aruba no conoce low season mas pa barconan crucero. Asina e mandatario di turismo Otmar Oduber a informa dialuna durante un conferencia di prensa. Cifra presenta ta mustra cu na 2013 a kibra tur record di cantidad di bishitante crucero cu 688 mil. A anuncia cu e record aki ta bolbe wordo kibra na 2017 cu cantidad di 746 mil bishitante di barco crucero.

SLOW SEASON?

"Ora cu ta ricibi na 2017 rond 200 mil pasahero den temporada cu antes tabata yama slow season, unda cu tabata ricibi 40 mil pasahero. Mi ta kere cu oficialmente por anuncia cu den mundo di barconan crucero no conoce un slow season mas", Oduber a bisa.

INFRASTRUCTURA A YUDA

Segun Oduber, parti di e exito ta e trabou grandi cu a wordo haci den renobacion di centro di ciudad, e parti infrastructural, linear-park y otronan cu a compromete, a haya delegacion di FCCA aki na Aruba cu por a comproba e trabounan cu a tuma luga. "Ey ta unda e episodio di e trayecto crucero a bira asina exitoso" Oduber a bisa. Segun e mandatario, 2013 a conoce cantidad record di 688 mil bishitante for di 570 mil cu tabata ricibi na 2009/2010. No a para keto cu esaki a pesar di decisionnan tuma na cierto momento cu Pullmantur cu a reduci nan cantidad di bishitanan di Aruba.  Combersacionnan a sigui tuma luga cu alto ehecutivonan. Sinembargo mester menciona cu Pullmantur a anuncia recientemente cu pa 2017 nan lo ta bek na Aruba (no solamente Pullmantur).

2017 lo kibra record di 2013

Dialuna e mandatario a anuncia cu pa 2017 lo kibra e record di 2013. Caminda cu un total di 746 mil pasahero ta wordo spera pa yega na Aruba. Ora compara esaki cu aña record 2013 cu tabata ricibi na Aruba 570 mil pasahero bou un otro maneho, ta papiando di un temporada di 6 aña cu un crecemento di casi 200 mil pasahero extra di barconan crusero cu ta yega nos isla. Esaki ta muestra di trabou enorme conhunto, Minister ta enfatisa.