MEP su lista di candidato lo mira cambio pa eleccion 2017

ORANJESTAD - MEP su lista di candidato lo mira cambio pa 2017. Esaki ta algun di e cambionan cu e partido a anuncia den fin di siman durante nan celebracion di 45 aña. Den su discurso lider di MEP, sra Evelyn Wever-Croes a reflecciona riba e 45 aña di MEP y tambe riba e añanan nos dilanti. Wever-Croes a elabora riba e diferente logronan di partido MEP durante e 45 añanan di diferente gobernacionnan di MEP como tambe e manera drechi cu MEP a goberna nos Pais den tur tempo. 

CAMBIO DI CARA

“Cu miras riba eleccion 2017, partido MEP un bes mas, contrario na partido AVP, lo pone e bienestar di e pueblo na prome luga” Wever a bisa. Entre nan, Wever a mustra cu nan lo drenta den tur cas cu nan mensahe y plan di solucionnan conbina cu cambionan necesario y caranan nobo riba nos lista. Sinembargo, e lider no a bisa si esaki ta nifica cambionan riba e prome 10 di e lista, of si simplemente lo haci cambio sporadico y no mishi cu esnan cu ta ocupa un funcion den Parlamento awo. 

FALTA 11 LUNA

Falta solamente 11 luna pa eleccion electoral na unda pueblo lo dicidi e rumbo di nos pais. "E 11 lunanan aki ta hopi crucial pa nos partido. Nos tin trabounan grandi cu nos mester haci. Encuestanan ta mustrando nos cu partido Movimiento Electoral di Pueblo ta creciendo y cu e sosten di e pueblo na e Gobierno di Mike Eman ta bahando" Wever a sigui bisa. A base di e informacion aki, nan ta bay sigui traha. "Naturalmente, nos no ta confia den encuestanan solamente. Nos tin trabounan grandi pa haci. Partido MEP lo drenta den cada skina di Aruba.  Nos lo traha pa convence pueblo di Aruba cu Movimiento Electoral di Pueblo ta e unico solucion”,  Wever-Croes a finalisa bisando.