Croes: Lo haci ultimo intento pa 'scapa' deal di casino

ORANJESTAD - Gobierno no tin pensa di sinta man crusa y laga e operadornan nobo di ex Aura Casino hala atras sin mas, lagando 25 trahado desampara. "Mayan mi lo reuni cu e eventual operador nobo pa mira si mi ta cambia e ultimo posicion aki" minister di labor Paul Croes a confirma na NoticiaCla.com laat diadomingo anochi. Manera ta conoci diabierna e operador Island Gaming den un primicia, a informa NoticiaCla.com cu nan ta 'hala atras' despues cu nan no a keda cla cu e sindicato FTA riba un posibel deal pa wanta e casino habri. E minister a tuma nota di e situacion y ta bay bringa esaki. 

ULTIMO ESFUERSO

E mandatario a splica e portal aki cu e reunion lo ta 'un ultimo esfuerso pa 26 trahador toch keda cu trabou na e casino", Croes a bisa. "Mi a pidi DPL pa e restant di 18 nos reuni cu asociacion di casino pa asina purba acomoda e trahadornan bek den e mesun sector", e mandatario a sigui bisa. No ta conoci ki ora e reunion aki ta, ni con e desaroyo lo ta. For di e operadornan, NoticiaCla.com a compronde cu nan no sa di ningun reunion y cu nan no tin reunion planea pa dialuna (ainda). 

REACCION ABOGADO

Algun rato prome, abogado pa e operador Island Gaming, esta Jeanot de Cuba, a reacciona pa e portal aki. Pa de Cuba, e ta mira cu partidonan envolvi a actua sin resultado desea. Nan a haci esaki -segun e abogado- citando leynan laboral sin tene cuenta sinembargo, cu e proposito di e ley ta pa combati abuso y no locual ta e caso aki esta, cuminsa un negoshi. Segun de Cuba, Island Gaming a wordo confronta cu demandanan irealistico y den trascurso di tempo a bira obvio cu e promesanan na e empleadonan a daña ambiente y a haci imposibel pa negocia. Segun de Cuba, varios cos a bay robes den e caso aki, cu finalmente a pone cu e deal a 'cay na awa'.