De Cuba: Kico a bay robes cu Island Gaming a 'hala atras'

ORANJESTAD - E situacion cu a surgi awor cu Island Gaming,- e operador cu mester a tuma ex Aura Casino over-, a hala atras, no ta esun di mas miho.Total di 44 trahado ta keda sin trabou, di cual 25 inicialmente tabata cla pa cuminsa traha. Abogado pa Island Gaming, Jeanot de Cuba, a reacciona na NoticiaCla.com riba e caso lamentabel, pero necesario. Pa de Cuba, e ta mira cu partidonan envolvi a actua sin resultado desea. Nan a haci esaki -segun e abogado- citando leynan laboral sin tene cuenta sinembargo, cu e proposito di e ley ta pa combati abuso y no locual ta e caso aki esta, cuminsa un negoshi.

E SITUACION DESPUES DI TMRG

Hopi cos segun e abogado, a sosode prome cu su cliente - Island Gaming- a bin 'den wega'. "TMRG (e operador anterior) a dal e casino cera (na december) y baha na awa. Despues e hotel a haya ta bon pa reduci e (tamaño) m2 di e casino cu mas di mitar. SVB a paga cessantia y ta despues numa Island Gaming a aparece riba scenario y a wak oportunidad pa cuminsa un negoshi" de Cuba a bisa. 

DEMANDA IREALISTICO

Pero segun de Cuba, Island Gaming a wordo confronta cu demandanan irealistico y den trascurso di tempo a bira obvio cu e promesanan na e empleadonan a daña ambiente y a haci imposibel pa negocia. Segun de Cuba, varios cos a bay robes den e caso aki, cu finalmente a pone cu e deal a 'cay na awa'. 

KICO A BAY ROBES

E abogado ta kere cu loke cu e sindicato a haci robes, ta opta pa purba cu un caso den corte, pa haya nan derecho. Pero esaki no a resulta y awor e miembronan cu nan ta representa, a keda man bashi. E suministro di informacion pa e.o. prensa, tambe no tabata corecto segun e abogado. Partidonan mester a stop di trata e caso den prensa, y tene nan mes na secrecia y confidencialidad. 

PULL THE PLUG

Tabata diabierna atardi cu NoticiaCla.com a raporta cu 'the deal is off'. E operador nobo a 'hala atras' despues cu partidonan contrario no por a cumpli cu e ultimatum duna di 5pm pa duna un contesta riba e oferta manda. Mirando e situacion cu a presenta, e operador no por a haci otro, cu hala atras. E demanda di e sindicato, manera cu e abogado awor ta confirma, tabata irealistico. Y comercialmente, algo asina no ta posibel. Y como tal, e mensahe tabata corto, firme, y al caso. No ta ranca mas largo na e deal aki y ta hala atras. Lamentablemente cu tur e consecuencianan cu esaki ta trece cu ne.