Appel di Oro ta simbolisa trabou excelente den enseñansa

ORANJESTAD - E Appel di Oro a bira un simbolo pa excelencia den enseñansa. No solamente e ta identifica di e trabou excelente di e nominado y ganadonan, pero e ta simbolico pa e trabou excelente cu ta tuma luga tur dia den enseñansa na Aruba. Minister di Enseñansa Michelle Hooyboer-Winklaar a agrega na e encuentro ameno, alegre y inspirativo diabierna anochi, cu e evento cu cual a cera e celebracion di Luna di Enseñansa 2016 ta un dedicacion, un momento pa honra esunnan cu ta haciendo algo sumamente importante pa nos pais. 

Hopi di esunnan cu a gana ta esunnan cu a dedica henter nan bida profesional y un bon parti di nan bida personal na e tema di enseñansa, Minister Hooyboer-Winklaar a bisa, expresando aprecio pa e ganadonan y e nominadonan.

Luna di Enseñansa ta wordo celebra durante henter luna di october, y ta consisti di un programa amplio cu actividadnan pa educadonan, pero tambe pa studiante y mayornan cual ta wordo organisa pa Ministerio di Enseñansa y Departamento di Enseñansa. E aña aki a inclui, ademas di workshopnan pa capacitacion den diferente area, momentonan di inspiracion, y encuentronan pa discuti topiconan specifico y temanan mas amplio cu ta biba den e mundo di enseñansa na Aruba y den otro paisnan.

E reconocimento Appel di Oro ta "lo minimo cu nos por haci pa esunnan cu ta carga asina un responsabilidad grandi cu hopi amor," e mandatario a comenta. Enseñansa ta riba caminda corecto y si sigui pone e studiante central den tur loke wordo haci lo logra hopi mas den enseñansa, Minister Hooyboer-Winklaar a subraya, y yega na e meta pa tur studiante, sin excepcion di nivel di habilidad, ta exitoso. Esaki ta e meta principal di enseñansa, ela agrega, y si tur persona traha riba e mesun meta lo yega mucho mas leu y ta garantisa un miho futuro pa nos studiantenan y nos pais, el a conclui bisando.

Hooyboer-Winklaar a felicita tur nominado y e ganadonan di Appel di Oro 2016, y ta gradici y expresa su admiracion pa cu nan dedicacion, amor y energia positivo cu nan ta inverti tur dia den e logronan di e muchanan, hobennan y adultonan cu ta participa den e mundo di enseñansa na Aruba.

E ganadonan den e diferente categorianan ta “Maestro di Aña” den Scol Primario ta Levi Geerman (Scol Basico Kudawecha), Scol Secundario: Annette Peterson-Bredie (Colegio Arubano), Scol Special: Yvonne Altman (Scol Paso Pa Futuro) y Scol Superior: Edgar Ras (Academia Policial Aruba).

Como dirigente di aña a scoge pa Scol Primario: Lorena Boekhoudt (Scol Preparatorio Washington), Scol Secundario: Erwin Lopez (EPB San Nicolas), Scol Secundario: Roseanna Garrido (Maria College MAVO), Scol Special: Sharline Geerman-Rodriguez (Scol Dun'un Man) y Scol Superior: Tim Croes (Universidad di Aruba).

Como actor di sosten di aña a scoge den Scol Primario: Susan Haime (IB-er di Colegio Frere Bonifacius), Scol Secundario: Adriana del Rosario Dorothal-Contreras (Trahado Social di EPB San Nicolas), Scol Special: Angelique Trimon (Klassenassistent di Scol Paso Pa Futuro) y Scol Superior: Irina Croes (Trahado Social di Colegio EPI).

Como “Newcomer of the Year” a scoge den Scol Primario: Anneliese Werleman (Colegio San Hose), Scol Secundario: Celio Vrolijk (C.G. Abraham de Veerschool) y Scol Special: Adrielle Geerman (Scol Practico pa Ofishi).

Como “Lifetime Achievement Award” a scoge Yin May Wong, dirigente di Scol Special Scol Paso Pa Futuro. Den demas premionan a entrega un Appel di Oro pa uzo di tecnologia moderno den klas na Sint Paulus School, Proyecto den Scol. Proyecto den Scol, Secundario: Stichting Sociaal Fonds Colegio Arubano, Proyecto den Scol, Primario: Wela di Scol di Caiquetio School y pa proyecto den scol superior a bay pa “Project Justitiebreed Opleiden” di Academia Policial Aruba