Herenveen: Surnam buscando confrontacion cu Aruba y Corsou

WILLEMSTAD – Surnam ta buscando confrontacion cu Aruba y Corsou segun director di Insel Air Corsou, Edward Herenveen na un corant di Surnam. Mientrastanto ta berdad cu Insel Air Aruba a tuma contacto cu minister di transporte di Aruba Otmar Oduber pa notifica nan di e problema cu e compania a haya cu Surnam. “Pero mas mi no sa” Oduber a sigura NoticiaCla.com diaranson merdia. Un anochi prome, e mandatario a splica cu e aerolinea ainda ta den proceso pa keda cla cu su documentonan pa por bula Surnam. “Pero ainda nan no ta cla” Oduber a sigura NoticiaCla.com un biaha mas diaranson merdia. Segun Oduber, fuera di notifik’e di e situacion, no a pidi e mandatario pa intermedia pa e compania aereo.

 Riba e posibilidad cu Insel Air por haya mas problema ainda y crea un problema entre e dos paisnan, Oduber no kier a duna mucho comentario. E director di Insel Air Corsou, Ed Herenveen mientrastanto di su banda a sigura cu si bolbe para e buelo, Aruba y Corsou lo boycot e avionnan di Surnam. Riba esaki, Oduber a bisa cu companianan no por haci esaki. Pues e lo bira un caso interesante.

Mientrastanto e director di Insel Air Corsou ta declara na e corant di Surnam, De Ware Tijd cu e compania di Corsou, ta rabia cu e autoridad di Surnam pasobra a nenga e compania e permiso pa bula directo entre Aruba y Surnam dialuna ultimo. A mustra tur documento cu ta bisa cu tin permiso pa bula, pero autoridad di Surnam ta haciendo fastioso, djis pa proteha Surinam Airways. E hecho cu a pone e avion pasa Corsou dialuna prome cu por a biaha directamente pa Surnam, a trece gasto extra pa e compania, pa no papia mes di retraso. “Nos lo cobra e autoridadnan surnamenjo e gastonan aki bek sigur” Herenveen a sigura e corant surnamenjo.

Di otro banda, autoridad surnamenjo di aviacion Gerard Brunings a bisa cu nada a pasa. Bruning a evita di reacciona riba un ‘declaracion di un comerciante riba nivel gubernamental’. Loke cu Hereveen declara, Bruning ta laga pa su cuenta. Den su analisis, Bruning ta bisa cu e compania di Corsou ta ekiboca pa ehecuta su Aruba plan, basa riba acuerdonan di aviacion existente. Insel Air ta disputa esey. Y como tal e ta bira un diferencia di interpretacion. Foto Edward Herenveen ta cortesia Curacao Chronicle.