Aruba Bank cu e sosten mas grandi na famia Kelly

ORANJESTAD - Diasabra ultimo “Comision Ban Yuda Famia Kelly” bou liderazgo di Ron Martis tabata activo for di 8:00am pa 8:00pm na Centro di Bario Noord, den un esfuerso pa logra recauda mas o menos 35 mil florin pa yuda un famia den necesidad. Famia Kelly a perde nan cas dia 14 di februari ultimo dor di un candela. Un total di 9 miembro di un famia humilde a keda riba caya na Kurimiauw # 2. 

A forma un comision cu mesora a percura pa busca asistencia social pa e famia mientrastanto, pero tambe pa recauda fondo pa por drecha nan cas mas lihe posibel. A pidi pueblo pa yuda cu material manera cashi, frigidaire y placa pa drecha e cas. 

Un cantidad di hende a yega Centro di Bario Noord pa saca un man, pero tabata un sorpresa masha agradabel ora a nota yegada di Nelleke Cardenas y Geraldine Nobrega di Aruba Bank cu un check grandi den nan man. Di e forma aki e representantenan di e banco cu ta carga nomber di nos pais, a haci un donacion di no menos cu Afl. 7.500,= den nomber di tur su clientenan y empleadonan, pa e famia por logra drecha nan cas pa asina nan por biba un bida normal atrobe.

Aunke cu e evento tabata diasabra, Aruba Bank ta encurasha comercio y pueblo en general cu ainda por haci un donacion riba e cuenta di banco na Aruba Bank mes, di e comision “Ban Yuda Famia Kelly”. Tur donacion, pa tiki cu e por ta, ta yuda e famia den necesidad pa drecha nan cas. 

Cu un sonrisa grandi riba nan cara, famia Kelly a acepta e check for di man di e representantenan di e banco, subrayando nan lema cu “Aruba ta nos isla y Aruba Bank ta nos banco”.