DESPA: Bestianan exotico den cuarentena y bon di salud

ORANJESTAD - E bestianan exotico cu a yega Aruba diadomingo via bapor, lo keda den cuarentena pa 3 luna y despues wordo transporta pa exterior pa adopcion. Asina departamento di Salud (DESPA) a informa diabierna atardi. Cu esaki tambe nan ta kibra nan silencio for di momento cu e animalnan a wordo haya. Ademas segun e departamento, e bestianan ta na bida, y ta den bon estado di salud. 

E SITUACION ACTUAL

Den un comunicado, DESPA a splica cu nan ta boga pa bienestar di hende y animal, cu esaki ta uno mas optimal posibel. Tabata dialuna ultimo DESPA a haya notificacion cu un boto a keda confisca cu tabata transporta animal ilegal pa Aruba. Mayoria di e animalnan ta cay bou di tratado di CITES, kiermen cu nan ta proteha. Diferente di e animalnan no a pasa mucho bon durante di e transportacion riba laman y algun a sucumbi debi na e condicionan menos faborabel cu nan a keda transporta aden. Aki no a tene cuenta cu bienestar di e animalnan.  

BESTIA ILEGAL PA ARUBA

Ora trece animal ilegal Aruba, diferente malesa, cu animal por ta un portador di nan, tambe por haci su entrada na Aruba manera rabies of schroefworm. No a haya ningun papel di declaracion di salud di e animalnan of otro documentacion cu e animalnan.  Aunke con bon e animalnan ta mustra di pafo, ora test nan por haya indicacion si e animalnnan ta carga cierto malesa cu nunca a yega wak aki na Aruba of cu e malesanan aki no ta wak nan mas aki. Esaki por forma un peliger pa nos animalnan domestico y di cria, pero tambe pa hende. Ta pa e motibo aki e animalnan tin di keda den cuarentena pa por lo menos 3 luna cu tur gasto cu esaki ta trece cu ne. Te aworaki ta Departamento di Salud Publico ta cargando cu mayoria di e gastonan. 

BESTIANAN DEN BON CONDICION

Na e momentonan aki e animalnan confisca ta den bon condicion y bon cuida. Departamento di Salud Publico ta den palabracion cu un grupo di interesado cu kier tuma na nan encargo e gastonan di tratamento y cuarentena di e animal, cu e condicion cu despues di e periodo di cuarentena e animalnan aki ta wordo adopta den exterior. Den e grupo di interesado ta conta cu veterinario tambe. Tur e proceso ta cay bou di supervision di Servicion Veterinario di Departamento di Salud Publico.

SOLUCION SATISFACTORIO 

Na e forma aki por bisa cu a bin cu un solucion satisfactorio pa tur esnan preocupa cu bienestar di e animalnan. Na prome luga Departamento di Salud Publico mes, pero tambe publico cu ta stima animal a sigui e aconticimento di e animalnan confisca di cerca. E miho decision segun DESPA a keda tuma na bienestar di e animalnan, teniendo na cuenta cu tabata necesario pa proteha nos mesun hende y animalnan aki na Aruba, cu ta tarea prinicipal di Departamento di Salud Publico.