Situacion di computer na WEB a normalisa atrobe

BALASHI - E situacion na WEB a normalisa diabierna (awe) unda cu cahanan pa pago  di e.o. recibo tabata habri atrobe. E situacion pues a normalisa atrobe cu ta pone cu por a habri tur caha y tur servicio atrobe. WEB a pidi dispensa y a gradici pa e comprension e dianan cu servicio no tabata 'on line' pa motibo di e problema di computer. 

E ATAKE

Dialuna ultimo WEB Aruba a bira victima di un atake cibernetico cual a afecta e sistema di automatisacion. A contene e atake rapidamente y asina a limita e efecto riba e sistema. E compania di awa y energia ta sigura cu su produccion di awa y coriente no a wordo afecta; pues no tin motibo pa preocupacion. Mientrastanto ta trahando duro pa mas pronto posibel pone e sistema di automatisacion bek den operacion. A pidi comprension di clientenan pa e hecho cu loketnan na Balashi tabata cera te proximo aviso.  

E atake cibernetico aki, a sosode por medio di un virus. Esaki ta diferente di un “hack”, na unda un entidad ta penetra e sistemanan activamente. Ta yama e virus aki un “Zero day exploit”. Esaki ta nifica cu practicamente ningun sistema di proteccion tin defensa contra dje ya cu e ta aparece pa prome biaha ariba internet. E virus a cuminsa ataca sistemanan rond mundo diadomingo atardi 6 or pm ora local. E prome paisnan afecta pa e virus aki tawata Alemania, Gran Bretania y Canada y pues desde dialuna Aruba tambe.