Listramento preventivo den weekend di Halloween

Posted on 10/28/2016, 4:29 PM AST | Updated on 10/29/2016, 7:23 AM AST

ORANJESTAD - Ministerio Publico y Cuerpo Policial di Aruba ta informa cu Polis lo listra preventivamente (preventief fouilleren) e weekend aki riba posesion di arma den diferente area.

E accion lo tuma lugar riba diabierna 28 di october, diasabra 29 di october y diadomingo 30 di october 2016. E orarionan ta como lo siguiente: 

Riba diabierna 28 di october 2016 di 6’or di atardi pa diasabra 29 oktober 2016 pa 6’or di mainta  Riba diasabra 29 di october 2016 di 6’or di atardi pa diadomingo 30 di oktober 2016 pa 6’or di mainta. 

E areanan den cual lo tene accion ta:

Zone I – e area di Ritz Carlton te House of Cheng, bao di cual ta cay De Olde Molen te na e toren di wak parha. Caya Frans Figaroa y e caminda di Palm Beach y Sasakiweg tambe ta cay bao Zone I Zone II – parkinglot di Do It Center na Shaba  Zone III – Luz di trafico dilanti Guardian Group te na cas di pueblo di Bushiri, Madiki Kavel, Caya Ernesto Petronia, rotonde Ponton, rotonde Sero Blanco, ringweg te na rotonde Mio, rotonde Tarabana, rotonde FCCA, rotonde luchthaven, rotonde Las Americas, Nikky Beach te na Guardian Group Zone IV – Seroe Patrishi 231  Zone V – Cas Casuela na Tanki Leendert.

Den cuadro di e accion di listramento preventivo riba posesion di arma, KPA ta autorisa pa para personanan na manera arbitrario y listra nan pa arma na nan paña. KPA ta tambe autorisa pa listra autonan y otro vehiculonan pa arma. Ademas KPA ta autorisa pa pidi pa habri cahanan, tasnan y otro pakinan pa listra pa arma. Ministerio Publico a autorisa KPA pa por haci esaki y na su turno, Ministerio Publico a pidi e autorisacion aki na Hues Comisario.