Caso di bestianan exotico ketobay hermeticamente cera!

ORANJESTAD - E situacion di e bestianan exotico ta birando un caso hopi mas misterioso cada dia, debi cu no ta dunando ningun informacion y tin e caso aki hermeticamente cera. Varios intento pa haya informacion tabata envano. Contestanan manera 'nos no ta autorisa pa duna informacion' ta birando custumber. Diabierna mainta, NoticiaCla.com a compronde di e hefe di departamento di Salud cu 'ta trahando riba dje ainda'. Mientrastanto NoticiaCla.com a haya confirma cu e bestianan, contrario na pensamento inicial, lo no bay pa cuido di Philip Animal Garden. Algo cu Philip Merryweather, propietario di facilidad di bestia a confirma pa e portal aki. E no por a bisa pakico cos a bay manera cu e ta. 

E ESTADO Y DESTINO DI E BESTIANAN

Mientras cu autoridad tin e caso aki hermeticamente cera pa publico y prensa, e portal aki a compronde inoficial cu algun di e bestianan ya a bandona departamento veterinario y a bay pa algun persona cu lo a keda encarga cu e bestianan aki. Cua di e bestianan esakinan ta, no ta conoci. Ademas e estado di salud di e bestianan, no ta conoci, pero ta conoci si cu e situacion tabata delicado, for di ora cu a ricibi e bestianan aki. 

OFERTA PA YUDA E CACHONAN

Un documento cu a cay den man di NoticiaCla.com ta confirma e bon intencion pa e bestianan, particularmente e cachonan, wordo atendi pa un of dos instancia (fundacion) dedica na e tema aki, unda cu nan a ofrece pa busca e cachonan aki, cuida nan, cubri nan gastonan medico pa inspeccion, y conforme ley, prepara nan pa posibel adopcion den exterior. Pero e grupo aki no a haya contesta tampoco pa nan carta cu nan a manda. 

BESTIANAN NO A BAY PA ANIMAL GARDEN

Manera cu e portal aki a raporta anteriormente, e bestianan exotico no tabata destina pa Phillip Animal Garden. Propietario di e zoologico, Phillip Merryweather a splica NoticiaCla.com cu mientras cu e tin bon conocemento di tur e bestianan aki, nan no tabata destina p'e. Di otro banda, por tin un indicacion kico a sosode. Pero e ta laga esey pa autoridad averigua. E ta lamenta si cu mesora a punta dede den su direccion riba e caso aki. 

MANEHO DI E BESTIANAN AKI

Merryweather a splica e portal aki, cu e bestianan exotico aki, mester di un tratamento special. For di e forma con ta laga nan adapta na nan habitat nobo, nan forma di come, mantenimiento etc. E no ta manera un bestia regular cu por wordo trata como un 'mascota' sin mas. El a mustra cu e tin conocemento amplio di tur e bestianan cu a yega, y si mester, por cuida nan tambe. NoticiaCla.com tin un raportahe amplio pendiente cu Merryweather pa loke ta e forma con e ta haya e bestianan cu e tin, mantene nan y futuro di e lugar. 

TA LAGA E BESTIANAN BIBA

Fiscal na ministerio publico a dicidi cu e bestianan cu a wordo trafica ilegal e fin di siman aki, ta keda 'na bida'. Esta cu contrario na intencion anterior, lo no pone nan drumi. Den un declaracion di vocero di ministerio publico Ann Angela, fiscal no ta di acuerdo cu mester pone e bestianan aki drumi pa desanima hendenan pa sigui trafica bestianan exotico den e forma ilegal aki. E ta algo ilegal pasobra nan (e bestianan aki) ta wordo protegi pa e tratado di Cites, cu ta un tratado pa proteha flora y fauna den peliger di desaparecion. "Lo laga nan biba" Angela a sigui bisa. Di otro banda, lamentablemente a raporta cu di e 10 toucan nan (parhanan exotico), 9 ya a fayece, y no ta descarta cu e ultimo tambe no ta bay sobrevivi. 

MANTENE BESTIANAN BIBO

Ademas cu e desicion di fiscal pa mantene e bestianan bibo, ta bin e reto pa mantene nan y ubica un lugar pa nan por keda. Servicio Veterinario ta ocupa awo cu e proceso pa busca un lugar pa nan. Pa loke ta e gastonan di mantencion, lo cobra e tres personanan (tur tres ta Arubiano) tur e gastonan aki segun Angela. Fuera di esey, ta evaluando e multa cu e personanan aki lo haya pa e hecho castigabel di trafica bestianan exotico, y e multa aki por core den miles di florin segun Angela. 

KEN TA PAGA PA NAN

E bestianan cu si a keda bibo, ta den quarantena pendiente nan situacion. Loke tambe ta hopi cuestionabel, ta cu tin hende na Aruba pa ken e bestianan aki tabata destina y cu ta yuda fomenta e ilegalidad aki. Segun e tres personanan responsabel, e bestianan aki tabata destina pa un persona local, aunke cu segun Angela, no por prueba esaki aunke cu a menciona nomber di e persona pa ken e bestianan aki tabata destina. 

E CAPTURA

E centro di coordinacion di Wardacosta a detecta cu radar diadomingo atardi un boto sospechoso sur di Aruba. Un patruya di Aruba a sali mesora cu un Super-RHIB pa busca contacto cu e boto aki. Mas of menos 4 miya sur di Barcadera a topa e boto aki. Dos persona di Wardacosta a subi abordo y a descubri varios animal exotico. Douane y Imigracion a wordo poni na altura y e boto a wordo hiba Bacadera. Eynan a bin controla e bestianan y a nota cu fuera di e bestianan, tabatin un cantidad di carton di cigaria y gasolin den bari. E capitan di e boto a ricibi un procesverbaal pa a trafica e material y bestianan di forma ilegal.

E BESTIANAN

E bestianan ta entre otro. 4 lora tipo mini Macaw, un jaguarundi, un ocelot, 11 toucan, 2 macaco Tamarin, 3 cacho rasa cocker spaniel, un rasa Great Dane, un bull terrier y 6 tortuga. E bestianan a wordo entrega na departamento veterinario.