Merca cla pa pone beslag riba propiedadnan liga na PDVSA

HOUSTON - Fiscalnan federal Mericano ta preparando pa acusa varios persona y confisca nan propiedad riba presunto sakeo di e compania estatal petrolero Venezolano Petrolios de Venezuela (PDVSA). E por conberti su mes den e beslaglegging di propiedad mas grandi di historia Mericano. Tres persona encarga cu e caso, ta bisa cu gobierno Venezolano ta investigando por lo menos un dozijn di Venezolano y ta spera cu por presenta cargonan na Houston contra nan otro luna caba. Esnan riba lista ta inclui ex ehecutivonan di PDVSA, y ta sospecha nan di soborno, y yuda saca mas di 11 biyon dollar for di e pais. Ademas, gobierno tin bista riba un cantidad di propiedad Mericano, incluyendo 20 propiedad residencial di cual algun ta na West Palm Beach den Florida y algun na Houston Texas.  

CONGRESO VENEZOLANO TA ACUSA

Congreso Venezolano, cu ta maneha pa oposicion, ta buscando forma pa recobra 11.3 biyon miyon cu a disparce di PDVSA entre 2004 y 2014 ora cu Rafael Ramirez, actual embahador Venezolano pa Nacionan Uni, tabata presidi e compania. Ramirez ta cataloga e acusacionan como falso. 

EFECTO PA ARUBA

Algun tempo atras, e hefe di e team negoshador pa e team di Aruba den e CITGO deal, Richard Arends, a sigura e portal aki cu e situacionnan di PDVSA manera raporta internacional, no tin efecto pa Aruba y CITGO Aruba. Sinembargo analistanan local ta refuta e pensamento aki indicando cu sigur esaki lo tin efecto.