Stichting Parkietenbos ta protesta cerca Gobierno

ORANJESTAD - Siman pasa 17, 18 y 19 di october biento a cay completo na Aruba y den oranan di anochi y marduga varios habitante di e barionan Parkietenbos, Mahuma y Simeon Antonio a sufri varios dia largo cu e holor stinki y huma di Dump cu a penetra e hogarnan di e besindario. Durante marduga habitantenan tabata lanta y sinti nan mes sofoca, hasta un miembro di nos directiva pa 2:24 di marduga a perde rosea den su propio cas y a cay na suela. E mainta ora cu ela tuma contacto cu mas habitante di e bario a bin compronde cu tin mas hende a bira malo y otronan cu tabata malo caba a sinti nan mes mas malo pa motibo di e huma y holor teribel di e dump. Tin mama cu tin yiu cu astma cu tambe a sinti malo, otronan cu tin nan grandinan ta biba den Simeon Antonio mester a sali di e bario y hibanan drumi den otro bario.  Stichting Parkietenbos a tuma contacto cu director interino di Serlimar Sr. Victor Robert pa pone e na altura di e situacion grave cu tabata pasando y practicamente a bira un menasa pa salud di habitantenan di e barionan menciona. Durante e dianan menciona siman pasa nos directiva a mantene contacto cu Serlimar kendenan a tuma e caso na serio y percura pa ya den ora di merdia e candelanan tabata domina y e huma ya no tabata sali mes hopi for di e dump y molestia e bisiñanan.

Por medio di carta cu a ser manda y e comunicado aki directiva di Stichting Parkietenbos ta urgi Ministerio di Medio Ambiente y di Salud Publico pa tuma e pasonan necesario mas pronto posibel pa e tipo di incidentenan aki no tuma lugar mas. Nos ya a entrega un manifiesto pa e Dump ser cera pa fin di e aña aki, sinembargo nos no por warda te fin di aña pa para molester pa nos habitantenan di bario. Mester bin cu un solucion di inmediato pa vigila e tempo y e candela na e dump pa proteha e salud di e habitantenan di besindario.